گونئی‌لی حقوقشوناس موسی برزینین سؤزلرینه گؤره، فارس دیلینی و یا اؤزلرینی بو دیل‌ده یاخشی ایفاده ائده بیلمه‌یه‌ن میلیونلارلا غیری-فارس اهالی ایران محکمه سیستمین‌ده «حاقلی ایکن حاقسیز دوروما دوشه بیلیر و عدالتسیزلییه معروض قالا بیلیرلر.»

گونئی‌لی حقوقشوناس متهیملرین ترجمه‌چی ایله تعمین اولونما حاقینین ایران قانونلاریندا کونکرت شکیل‌ده ضمانته آلینمادیغینی وورغولاییر. او دئییر کی، محکمه‌لرده غیری-فارس ایجمالارا منصوب وطنداشلارین مدافعه حاقی تام یئرینه یئتیریلمیر.

«ایران‌دا میلیونلارلا اینسان فارسجا بیلمیر، بیلسه ده اؤزونو فارس دیلین‌ده ایفاده ائتمکده چتین‌لیک چکیر. بیر شخص اؤزونو هر هان‌سی بیر دیل‌ده ایفاده ائتمکده چتینلیک چکیرسه و اؤز آنا دیلی و یا باشقا دیلده داها راحتدیرسا، او اؤلکه اونون اؤزونو راحت ایفاده ائتمه‌سی اوچون لازیمی ایمکانلاری تعمین ائتمه‌لیدیر،» برزین سؤیلییر.

او، ایران محکمه‌لرین‌ده اینسانلارین دیل پروبلمی اوزوندن عدالتسیزلییه معروض قالا بیلدیکلرینی اؤنه چکیر:

«اینسانلار محکمه‌ده اؤزلرینی قانونون معین ائتدیی دیل‌ده ایفاده ائده بیلمه‌سه‌لر، بو او معنایا گلیر کی، عدالت اونلار اوچون تعمین اولا بیلمه‌یه‌جک. او اینسانلارین عدالتسیزلییه معروض قالما احتیمالی داها چوخدور. بو مسئله خصوصیله ده جزا محکمه‌لرین‌ده چوخ اؤنملیدیر. متهیم یا شیکایتچی فرق ائتمز، محکمه‌ده اؤزونو ایفاده ائده بیلمه‌سه و سؤزلرینی محکمه مسئوللارینا یا حاکملره چاتدیرا بیلمه‌سه، قارشی طرف اونو مغلوب ائده بیلر. بو شخص حاقلی ایکن حاقسیز دوروما دوشه بیلر.»