تبریز شهری ایله اصفهان شهری آراسین‌دا نئچه یوز ایللیک تاریخی رقابت کئچمیشده اولدوغو کیمی بو گون‌ده بوتون ساحه‌لرده داوام ائدیر.

بو تاریخی رقابت صفویلر دولتی دورونده ۱۵۴۸-جی ایلده پایتختین تبریزدن موقتی اولاراق باشقا آذربایجان شهری قزوینه، شاه عباس حاکمیته گلدیکدن سونرا ایسه ۱۵۹۸-جی ایلده بیردفعه‌لیک اصفهان شهرینه کؤچورولمه‌سیندن سونرا باشلاییب.

بو گون سیاسی، اقتصادی، مدنی ساحه‌لرده داوام ائد‌ن رقابت ایدمان ساحه‌سینده، خصوصاً فوتبول یاریشلاریندا داها قاباریق شکیلده اؤزونو گؤستریر.

آوگوستون ۱۰-او آخشام ساعتلاریندا اصفهان شهرینین "نقش جهان" ایستادیونوندا گرگینلیک و چوخسایلی قارشی‌دورمالار فونوندا کئچیریلن «تراکتور»-«سپاهان» قارشیلاشماسی همین تاریخی رقابتین داوامیدیر.

بو سبب‌دن ده ایکی رقیبین قارشیلاشماسی ایران پرمیر لیگاسینین ان حساس قارشیلاشماسی کیمی قیمتلندیریلیب، ایران مئدیاسیندا ان چوخ مذاکیره اولونان موضوع‌لاردان بیرینه چئوریلیب.

مسئله‌نین آذربایجان‌لیلار، خصوصاً "تراکتور" طرفدارلاری اوچون اهمیتینی نظره آلاراق، ایکی رقیبین فوتبول ساحه‌سینده‌کی قارشیلاشمالارینین تاریخچه‌سینی قیساجا اولاراق تقدیم ائدیریک.

لیقا ماتچلاریندا ایکی رقیب کومان‌دا ۳۱ دفعه اوز-اوزه گلیب، ۱۵-دفعه «سپاهان»، ۸-دفعه «تراکتور» قالیب گلیب، ۸ اویون هئچ-هئچه باشا چاتیب.

قارشیلاشمالاردا عمومی‌لیکده ۷۵ قول وورولوب، بونلاردان ۴۴-او «سپاهان»، ۳۱-ی ایسه «تراکتور» رقیبینین قاپیسیندان کئچیریب.

"تراکتور"لا "سپاهان"این ایلک قارشیلاشماسی ۱۶ مای ۱۹۷۵-جی ایلده تبریزین باغشمال ایستادیونوندا "تخت جمشید" کوبوکو چرچیوه‌سینده کئچیریلیب. همین قارشیلاشمادا کوماندالارینین هر بیری رقیب قاپیدان ۱ قول کئچیره‌رک، اویونو برابرلیکله باشا ووروبلار. ایکی کوماندا آراسیندا عینی موسومده کئچیریلن جواب ماتچی «سپاهان»این غلبه‌سی ایله مشایعت اولونوب. بو گؤروش‌ده «سپاهان» ۱:۰ حسابی ایله «تراکتور»او ایلک دفعه مغلوب ائدیب.

تبریز کومانداسی "سپاهان" اوزرینده ایلک غلبه‌سینی ۱۹۹۰-جی ایلده قازانیب. بو قارشیلاشمادا «تراکتور» تبریزده کئچیریلن گؤروشده سیروس دین محمدینین ایکی قولو و کریم باقرینین پنالتی‌دن ووردوغو قوللا ۳:۱ حسابی ایله رقیبینه قالیب گلیب.

تبریز-اصفهان رقابتینین سونونجو قارشیلاشماسیندا ایسه اصفهان ۳-۱ حسابی ایله نتیجه‌نی قازانیب.