بو گون تبریز شهرینین روسیه اوردوسو طرفیندن اشغال ائدیلمه‌سی‌نین ایلدؤنومودور.

Axar.az خبر وئریر کی، ۱۹۱۱-جی ایل دکابرین ۱۹-دا روسیه اوردوسو بیر نئچه گونلوک محاصره‌دن سونرا تبریز شهرینه داخیل اولوب.

روسییانین تبریزی اشغال ائتمه‌سی قاجار خزینه‌دارلیغی‌نین آمریکا دیپلوماتی مورگان شوستره تاپیشیریلماسیندان سونرا باش وئریب.

روسیه بونا گؤره قاجار حکومتینه اولتیماتوم وئریب، شوسترین ایشدن اوزاقلاشدیریلماسینی طلب ائدیب.

اولجه، بونا اهمیت وئرمه‌یه‌ن قاجار دولتی روسیه‌نین هجوما حاضیرلاشدیغینی گؤردوکدن سونرا طلبله راضیلاشیب.

آنجاق بو، روسیه‌نین اشغالی‌نین قارشی‌سینی آلماییب. اونلار شمال بؤلگه‌لری، او جمله‌دن، تبریز شهرینه گیریبلر.

روسیه اوردوسونون تبریزی اشغال ائتمه‌سی نتیجه‌سینده اؤلنلرین دقیق سایی بیلینمه‌سه ده، بیر سیرا منبع‌لرده، تخمیناً، ۱۲۰۰ نفرین هلاک اولدوغو یازیلیب.

هجومون ایلک گونو تبریزلیلرین اؤزونو مدافعه دسته‌لری مقاومت گؤستریب. لاکین، حربی تجروبه و یئترلی سلاح-سورساتا مالیک اولمادیقلارینا گؤره ایتکیلری چوخ اولوب.

روس اوردوسو تلگراف خطلرینی کسه‌رک تبریزلی مدافعه‌چیلری باشقا یئرلرله علاقه‌سینین و یاردیم ایسته‌مه‌لرینین قارشی‌سینی آلیب.

دؤیوشلرین اوچونجو گونونده جلفادان داها ۵ مین روسیه عسگرینین تبریزه گؤندریلمه‌سی مدافعه‌چیلرین مغلوبیتینه سبب اولوب.

شهره داخیل اولان روسیه اوردوسو قیرقین تؤره‌دیب، تانینمیش شخصیتلر و مدافعه دسته‌لرینین باشچیلاری اعدام ائدیلیب.

روسلار ۱-جی دنیا محاربه‌سینین اورتالارینا - عثمانلی قوشونلارینین هجومونا قدر تبریزده قالیبلار.

۱-جی دونیا محاربه‌سی ایللرینده تبریز دفعه‌لرله روسیه-عثمانلی محاربه‌سینین میدانینا چئوریلیب: گاه او، گاه دا بو بیری طرفین الینه کئچیب.