ایران‌دا کئچیریلن پرزیدنت سئچکی‌سی اؤنجه‌سی مسعود پزشکیان باره‌ده داواملی اولاراق ایشلتدییمیز «آذربایجانلی» و «تورک» نامزد ایفاده‌سینین مدتی بیتدی، بوندان سونرا اونو یالنیز ایران پرزیدنتی و ایران‌دا حاکم سیاسی-ایدئولوژی سیستمین سیاستلرینین اجراچی‌سی کیمی تقدیم ائتمک لازیم‌دیر.

جناب پزشکیان اؤزو ده حزبوللاه ترور تشکیلاتینین رهبری شیخ حسن نصروللاها یازدیغی مکتوبدا بونو آیدین شکیلده ایفاده ائدیب.

او، مکتوبون‌دا ایرانین بوندان سونرا دا «مقاومت جبهه‌سی»نه (تهران حکومتینین پروکسی قوه‌لرینه) هرطرف‌لی دستیینین داوام ائتدیریلجیینی، بوندان اولکی سیاستین دییشمیجیینی آچیق شکیلده بیان ائدیب.

«مقاومت جبهه‌سی» آدلاندیریلان ترور تشکیلاتلارینین آراسیندا آذربایجان رسپوبلیکاسینا قارشی اولان و اؤلکه‌ده «اسلام انقلابی»نی رئاللاشدیرماغا چالیشان «حسینیون» گروپلاشماسینین دا اولدوغونو اونوتمایاق.

مسعود پزشکیانین سئچکی قاباغی تبلیغات و تشویقات کامپانییاسی پروسسین‌ده ایشلتدیی ایفاده‌لر، اؤزونون آذربایجانلی و تورک اولماسی، بونونلا فخر ائتمه‌سی باره‌ده چیخیشلاری تورکلرین سسینی قازانماق نیتی ایله ده اولسا، مثبت حرکت کیمی دیرلندیریلمه‌لیدیر. آنجاق بوندان اول ده قید ائدیلدیی کیمی، بو، یالنیز اونون پرزیدنت سئچیلمه‌سینه کیمی آذربایجانلیلارین ملی کیملیک، دیل و مدنیتلری ایله باغلی ایستکلرینین یوکسک تریبونالاردان سسلندیرییمه‌سینه فایدالی اولا بیلردی و اولدو.

بوندان سونرا ایسه پزشکیانین هارالی اولماسی و ملیتینین اهمیتی آزالدی. او، ایندی یالنیز ایران اسلام رسپوبلیکاسینین سیاستلری، ایرانین نقصانلی کونستیتوسییاسی و آقای علی خامنه‌اینین گؤستریشلری چرچیوه‌سینده فعالیت گؤسترمه‌یه محکوم و مجبوردور.

بو گون کیمی تبریز، توفارقان و اوسکو شهرلرینی ایران پارلامنتین‌ده لیاقتله تمثیل ائد‌ن مسعود پزشکیاندان بون‌دان سونرا عینی فعالیتی گؤزله‌مک گله‌جکده داها بؤیوک خیال قیریقلیغینا و مایوسلوغا سبب اولا بیلر.

اوزون ایللر خاریجی اؤلکه‌لرده قاچقین حیاتی یاشایان، اؤزلرینی ملا رژیمینین مخالیفی کیمی قلمه وئره‌نلرین بیر نئچه گون عرضینده مسعود پزشکیان تیمثالین‌دا تهران حاکمیتینه لگیتیم‌لیک قازاندیرماق جهدلری یئرسیزدیر.

تهران رژیمینین ۴۵ ایللیک حاکمیتی دؤورونده بیر نئچه دفعه بئله حادثه و دییشیکلیکلر تجروبه ائدیلیب، یاشانیب و هر بیرینین نتیجه‌سی عمومی مایوسلوق، بزگینلیک اولوب.

بورادا مسئله مسعود پزشکیان دئییل، پروبلم ایرانین قصورلو کونستیتوسییاسی، اونون دینی لیدرین هگمون‌لوغونو مطلقلشدیره‌ن ۱۱۰-جو ماده‌سی، اونون تام اجراسینا جوابدئه اولان کونستیتوسییایا نظارت شوراسی، اونلاری قورویان سپاه و یاریم-حربی «بسیج» قوه‌لرینین موجودلوغودور.

ایران پرزیدنتی مسعود پزشکیان آذربایجان‌لی و تورک اولدوغونا گؤره فخر ائتسه ده، کونستیتوسییانین غیری-فارس خالقلارین ملی حقوقلاری ایله باغلی یاریمچیق ۱۵-جی ماده‌سینی بئله تام اجرا ائده بیلمه‌یه‌جک.