مسئوللارین سئچیلمه‌سی و تعیناتی پروبلئمه چئوریلیب، متخصص کادرلارین تکلیف اولونماسینی ایسته‌ییریک. آنجاق هر کس اؤز تانیشینی اؤنه چکیر، بیلمیرم نئجه ائدک، آخی بیز میللی بیرلیک حکومتی قورماق ایسته‌ییریک.

Axar.az خبر وئریر کی، بو سؤزلری ایران پرزیدنتی مسعود پزشکیان سئچکی قرارگاهلارینین عضولری ایله گؤروشونده دئییب.

او، اؤلکه‌نین بیر گروپ و سیاسی جریانا باغلی شخصلر طرفیندن ایداره ائدیلمه‌سی‌نین علیهینه اولدوغونو، یالنیز انسانلارین باجاریقلی و مسئول اولدوقلاری ساحه‌لرده‌کی بیلیکلرینه گؤره ایشه گؤتورولمه‌لی اولدوقلاری باره‌ده اوولکی فیکیرلرینی تکرار ائدیب.

پرزیدنت اونونلا علاقه ساخلایا، گؤروشه و دانیشا بیلمه‌یه‌نلره ده مراجعت ائدیب:

"من ائله اوولکی آدامام، ساده‌جه ایندی سیزلر منیم چیینلریمه علاوه یوک، مسئولیت قویوبسوز. اونا گؤره ده، گئجه-گوندوز چالیشماغا مجبورام و علاوه واخت تاپا بیلمیرم. بو، دییشدییم و سیزلری اونوتدوغوم آنلامینا گلمه‌مه‌لیدیر، ساده‌جه واخت یوخدور. ایش واختیمدان کسیب سیزلره واخت آییرسام دا ایشله‌مه‌مک‌ده گوناهلاندیراجاقسینیز، اساس اودور کی، ایشیمیزی یئرینه یئتیره‌ک، خالقین راضیلیق سوییه‌سی ایسه فعالیتیمیزین کئیفیتی‌نین گؤستریجی و اؤلچوسو اولاجاق"،- پرزیدنت قید ائدیب.