آلمانیانین «بیلد» قزئتینده «آذربایجان هوا یوللاری»نا مخصوص سرنشین طیاره‌سینین قضایا اوغراماسی زمانی پیلوتلارین یوکسک پئشه‌کارلیغیندان بحث ائد‌ن مقاله یاییملانیب.

Axar.az خبر وئریر کی، "قهرمان پیلوتلار معجزه‌نی بئله باجاردیلار" سرلوحه‌لی مقاله‌ده قضا ائنیشی ائتمه‌یه حاضیرلاشان طیاره‌نین سرنشینلری آراسیندا اؤلوم قورخوسونون حکم سوردویو بیر شرایط‌ده پیلوتلارین غیرعادی جسارتی سایه‌سینده داها بؤیوک انسان ایتکیسینین قارشیسینین آلیندیغی، ۶۷ سرنشیندن ۲۹-نون ساغ قالدیغی وورغولانیب. یازیدا باکی‌دان چچنیستانا اوچان طیاره‌نین گروزنی سماسیندا کنار مداخله‌لره معروض قالماسینا باخمایاراق، خزر دنیزی اوزریندن قازاخیستانادک بیر نئچه یوز کیلومتر مسافه قت ائتدیی و آکتاو یاخینلیغیندا قضایا اوغرادیغی خاطیرلانیب. طیاره‌نین قضالی وضعیتده اولماسینا باخمایاراق، بو قدر اوزون مسافه قت ائتمه‌سینین پیلوتلارین پئشه‌کارلیغی سایه‌سینده ممکون اولدوغو بیلدیریلیب.

«بیلد» قزئتینه آچیقلاما وئرن آویاسییا متخصصی یاکوب ورت پیلوتلارین پئشه‌کارلیغینی محتشم نائلیت آدلاندیریب: «اوچوشون گئدیشاتینی و ائنیش جهدینی نظره آلدیقدا گؤروروک کی، طیاره نظارتدن چیخیب. پیلوتلارین زدلنمیش طیاره‌نی خزر دنیزی اوزریندن آکتاویا چاتدیرماسی بؤیوک نائلیتدیر».

مقاله‌ده قید ائدیلیب کی، طیاره آچیق دنیزین اوزرینده قضایا اوغراسایدی، بو، بوتون سرنشینلر اوچون اؤلوم دئمک اولاردی.