۲۰۲۳-جو ایلین یانوار-نویابر آیلاریندا آذربایجان‌دا ۴۹ مین ۴۷۶ هکتار ساحه‌ده کارتوف اکیلیب، ۹۹۵ مین ۹۱۶ تن کارتوف تداروک اولونوب. بو گؤستریجی ۲۰۲۲-جی ایلین عینی دورو ایله هم اکین ساحه‌سینده، هم ده محصول ییغیمیندا آزالما دئمکدیر.

Axar.az خبر وئریر کی، بونو اقتصادچی رازی عباس بیلی دئییب.

اقتصادچی بیلدیریب کی، آذربایجانین کارتوفا اولان ایللیک داخلی طلباتی ۱ میلیون تنا یاخیندیر:

«منتیقله یئرلی تداروک حسابینا داخلی بازارین طلباتینی تام اؤد‌مک اولار. لاکن محصولون بیولوژی اولاراق ساخلانماسی چتیندیر و ساخلانما سویودوجولاری دا یئترلی سایدا دئییل. اونا گؤره ده اؤلکه‌میزده تداروک ائدیله‌ن کارتوف اساساً خارجه اخراج ائدیلیر. ۲۰۲۳-جو ایلده آذربایجاندان تخمیناً ۶۲۵ مین ۷۵ تن کارتوف (۳۸،۴۲% آرتیم) اخراج ائدیلیب. یعنی اؤلکه داخلینده تداروک ائدیله‌ن کارتوفون ۶۲ فایزی روسیا بازارلاری باشدا اولماقلا خارجه ساتیلیب.

یئنه ده ۲۰۲۳-جو ایلین استاتیستیکاسینا گؤره، همین ایل خارج‌دن آذربایجانا ۲۲۶ مین ۹۰۶ تن کارتوف ادخال ائدیلیب.

رقملرده اویغونسوزلوق وار. یا داخلده تداروک ائدیله‌ن کارتوفون حجمی رئاللیغی ایفاده ائتمیر، یا دا اخراج و ادخال ائدیله‌ن کارتوفلا باغلی استاتیستیکا».

اکسپرت ایران‌دان گتیریله‌ن ۴۷ تندان چوخ کارتوفون یارارسیز چیخماسینا دا مناسبت بیلدیریب و بونون جدی رقم اولماسینا دقت چکیب:

«۴۷ مین تن کفایت قدر جدی بیر رقمدیر. یعنی حقیقتا سون گونلر یول کنارلاریندا کیسه ایله کیلوگرامی ۴۰ قپییه تکلیف ائدیله‌ن کارتوفلار قیدا اوچون یارارسیزدیر؟ بو حاق‌دا بیر فکریم یوخ‌دور. لاکن رسمی آچیقلامادا دئییلیر کی، ایران‌دان گتیریله‌ن ۴۷ مین تندان چوخ کارتوفدا «کارتوف گؤوده نماتودو» آشکارلانیب.

دئمه‌لی، آذربایجانین کارتوف ادخالاتیندا اساس یئرلردن بیرینی توتان ایراندان اؤلکه‌میزه مطبخ‌ده استفاده‌یه یارارسیز کارتوفلارین کوللی مقداردا داخل اولماسی هر زمان ممکون‌دور.

اونو دا قید ائدیم کی، ایران دنیادا نشاستا استحصال ائد‌ن اساس اؤلکه‌لردن بیریدیر. عینی زمان‌دا حیوان یئملرینین حاضرلانماسی اوچون ده بؤیوک اراضیلرده کارتوف اکیلیر.

اقتصادی سانکسییالار سببیندن ایران عادتا صنایع‌ده استفاده ائدیله‌ن نشاستانی دنیا بازارلارینا چیخارا بیلمیر. بو زمان خارجی بازارلارا تکنیکی مقصدلر اوچون یئتیشدیریله‌ن کارتوف اخراجاتی آرتیر. آذربایجان دا ایران‌دان کارتوف اخراج ائد‌ن اساس اؤلکه‌لردن بیریدیر».