۱۹۷۹-جو ایلده‌ن بری بیر چوخ بحرانلارلا اوزلشمه‌سینه باخمایاراق هله ده موجودلوغونو قورویوب ساخلایان اسلام رسپوبلیکاسینین قورولماسی و آیاق‌دا قالماسینین اساس عاملی آمریکادیر!

ایرانین حاضرکی لیدری، ۳۵ ایلدن چوخدور دیکتاتور و مطلقیتچی بیر شکیل‌ده حاکمیت‌ده اولان علی خامنه‌ای آمریکانین بؤلگه‌ده‌کی ماراقلارینین تعمین اولونماسین‌دا میثیل‌سیز رول اویناییب.

او، حاکمیتین بوتون اساس قوللاری، او جمله‌دن سلاحلی قوه‌لر، محکمه سیستمی و تهلوکه‌سیزلیک آپاراتی اوزرینده تام نظارتی قورویوب ساخلایا، گئنیش یاییلمیش خالق اعتراضلارینا باخمایاراق رژیینین سقوطونون قارشی‌سینی آلا بیلیب.

معلوم‌دور کی، اسلام رسپوبلیکاسی اول‌دن کوتله‌لری گئنیش یاییلمیش رپرسییالار، انسان حقوقلارینین پوزولماسی و داواملی عدالتسیزلیک اساسیندا اداره ائدیب. بو ایللر عرضینده ایرانین مختلف شهرلرینده رژیمین سقوطونو طلب ائد‌ن و تکرارلانان اجتماعی اعتراضلارا تهلوکه‌سیزلیک قوه‌لری دفعه‌لرله زوراکی‌لیق و قانلی رپرسییالارلا جواب وئریب و بو گونه کیمی حاکمیت استروکتورون‌دا هئچ بیر دییشیک‌لیک اولماییب.

سوال یارانیر: نیه گؤره، واختیله آمریکانین دا یاخین متفیقی اولان صدام حسین کیمی گوجلو دیکتاتور و باشقا تیرانلارین دئوریلمه‌سی، آمریکانین بو پروسسلرده اساس رول اویناماسینا باخمایاراق اسلام رسپوبلیکاسی قورولوشو و بو گون اونا باشچی‌لیق ائد‌ن علی خامنه‌ای مطلق حاکمیتینی قورویوب ساخلایا بیلیب؟

بیرینجی‌سی، اسلام رسپوبلیکاسینین بؤلگه‌ده‌کی ایستر مقصدلی، ایسترسه ده مقصدسیز حرکتلری آمریکانین استراتژی و تهلوکه‌سیزلیک ماراقلارینا اویغوندور. یاخین شرقه مداخله ائتمک و بؤلگه‌نین گئنیش انرژی احتیاطلارینا نظارت ائتمک اوچون واشینگتن ایرانین اؤز پروکسی قوه‌لری و رگیونال سیاستلری چرچیوه‌سینده یاراتدیغی گرگینلیک و بحرانلاردان ماکزیمم فایدالانیر.

باشقا طرفدن ایسه آمریکانین ان بؤیوک گلیر و اقتصادی گوج منبع‌لریندن بیری اولان سلاح صنایع‌سی بو وضعیتین داوام ائتمه‌سین‌ده حل ائدیجی رول اویناییر. یاخین شرق‌ده داوام ائد‌ن تهلوکه‌سیزلیک و گرگینلیک بؤلگه اؤلکه‌لرینین بؤیوک مدافعه بودجه‌لری آییرماسینا سبب اولوب و بو سلاح آلیشلاری مقاویله‌لرینین اکثریتی آمریکا سلاح شرکتلری ایله باغلانیر. بو زنگین گلیر منبعینین قورونوب ساخلانیلماسی، حاکم وضعیتین داوام ائتمه‌سی و اسلام رسپوبلیکاسینین موجودلوغو واشینگتنون منافعینه اویغوندور.

باشقا بیر واجیب مسئله ایسه "اسلام دنیاسی" آدلاندیردیقلاری بؤلگه اؤلکه‌لری آراسینداکی درین دینی و ایدئولوژی اوچوروم‌دور؛ بؤلگه‌ده ایران شیعه، سعودیه عربستانی و تورکیه ایسه سنی مسلمانلارین لیدرلیینه ادعالیدیرلار. باشدا آمریکا اولماقلا ایسه غرب گوجلری بیر چوخ رگیونال سیاسته کؤلگه سالان بو دینی ایکی‌لیلیکدن و فرقلردن بؤلگه اؤلکه‌لرینه تضییق و نظارت واسطه‌سی کیمی استفاده ائدیرلر. بو کونتکستده آمریکا عرب اؤلکه‌لرینین بؤلگه‌ده تام دمینانتلیغینین قارشی‌سینی آلماق و گوج بالانسینی قوروماق اوچون ایرانی تأثیرلی بیر اویونچو کیمی آیاق‌دا ساخلاماغا اوستونلوک وئریر.

نظره آلماق لازیم‌دیر کی، ایرانین نووه سلاحینا مالک اولماسی مسئله‌سی هم ده بؤلگه‌ده همین گوج بالانسینین پوزولماماسی اوچون واشینگتنون قیرمیزی خطینه چئوریلیب و ایرانین بو جور سلاحلار الده ائتمه‌سینه اجازه وئرمیجیینی آچیق شکیل‌ده بیلدیریب. البته بورادا رئگیونال گوج بالانسینین پوزولماماسی ایله یاناشی، هم ده آغ ائوین ایستراتئژی موتتفیقلرینین، خصوصاً ده اسرایلین تهلوکه‌سیزلییی واجیب رول اویناییر.

نتیجه اعتباریله، دئمک اولار کی، تهران رژیمینین قورونوب ساخلانیلماسی مسئله‌سی هم ده، اقتصادی، تهلوکه‌سیزلیک و استراتژی ماراقلارین بیرلشدیی مرکب گئوسییاسی اویونون بیر حصه‌سی‌دیر.

بونا گؤره ده، بین‌الخالق سیاستین و رگیونداکی گوج تنلیکلرینین مرکبلیینی نظره آلمادان رژیملرین سرعتله سقوطونون سادلشدیریلمیش تحلیللری مؤوجود رئاللیغین اصل منظره‌سینی تصویر ائده بیلمز.

آنجاق!

دلارین کسکین باهالاشماسی و حکومتین اقتصادی سیاستینین افلاسین‌دان سونرا ۲۰۲۵-جی ایل دکابرین ۲۸-دن تهران بازارین‌دان باشلایان و بیر نئچه گون عرضینده اؤلکه‌نین اونلارلا شهره یاییلان اعتراض میتینقلری اسلام رسپوبلیکاسی تاریخینین ان ضعیف دؤنه‌مینه تصادف ائتدیی اوچون سورپیریزله نتیجه‌لنه بیلر.

سوریا، غزه، لبنان، یمن و عراق‌دا تهرانین متفیقلری و پروکسی گروپلارینین دارماداغین ائدیلمه‌سی، اسرایلله ۱۲ گونلوک محاربه‌دن و آمریکانین نووه اوبیکتلرینی بمبالاماسی خامنه‌ای دیکتاتوراسینین تضییق و تأثیر واسطه‌لرینین ایتیریلمه‌سی ایله نتیجلنیب، تهرانین بؤلگه‌ده بحران یاراتماق امکانلارینی اهمیتلی درجه‌ده آزالدیب.

بونلارلا یاناشی ایندیکی مرحله‌ده چین عاملی و آمریکا-چین آراسینداکی یئنی اقتصادی-تجاری ساواش‌دا تئهران رئژیمینین تالعیینین نئجه اولاجاغی دا اهمیت‌لی رول اویناییر.

معلوم‌دور کی، پکینله تجاری ساواش‌دا اولان واشینگتن ایرانین چینله باغلادیغی ۲۵ ایللیک هرطرف‌لی ایستراتژی طرفداشلیق مقاویله‌سین‌دن، ایرانین چینه اوجوز نفت ساتیشیندان و پکینی باشقا واجیب خام ماللارلا تعمین ائتمه‌سین‌دن غضب‌لیدیر.

ونزوئلانین پرزیدنتی نیکولاس مادورونون دا باشینا گلنلر داها چوخ بو اؤلکه‌نین ایرانلا بیرگه چینه اوجوز نفت ساتیشی ایله باغلی‌دیر.

بوتون بونلار ایسه آمریکانین اسلام رسپوبلیکاسی حاکمیتینین دئوریلمه‌سینده ماراق‌لی اولماسی احتمالینی آرتیرسا دا، حاضرکی حاکمیته رئال و گوجلو آلترناتیوین اولماماسی رژیم دییشیک‌لییی مسئله‌سین‌ده واشینگتنون ترددود ائتمه‌سینه سبب اولا بیلر.

ان واجیب مسئله‌لردن بیری ده آمریکاننین بؤلگه‌ده اسلام رسپوبلیکاسی یئرینه باشقا بحران منبعی یارادا بیلیب-بیلمه‌مه‌سی‌دیر. رئال یئنی بحران مرکز و منبعینین یارادیلاجاغی، تهرانین واشینگتنون شرطلری ایله رایلاشماماسی تق‌دیرده ایسلام رئسپوبلیکاسینین مؤوجودلوغونا سون وئریلمه‌سی مومکون‌دور.

آنجاق ۴۷ ایل بویونجا تهرانین یئرینه یئتیردیی میسیانی، اقتصادی، سیاسی، ایستراتئژی و جوغرافی جهت‌دن داها ضعیف اولان طالبان افغانستانینین یئرینه یئتیریب-یئتیره بیلمیجیی هله‌لیک تام آیدین دئییل.