ترامپ ایرانلا باغلی وضعیتین دییشدیینی، تهرانین «راضیلاشما آختاردیغینی» دئییب. ایران اطرافیندا یئرلشدیریلن حربی قوه‌نین ونزوئلا یاخینلیغین‌داکی قوه‌لردن داها چوخ اولدوغونو وورغولایان ترامپ بیلدیریب کی، دیپلماتیا یولو آچیقدیر، اونلار (ایران) راضیلیغا گلمک ایستییرلر، دفعه‌لرله زنگ ائدیبلر.

«یو اس اس آبراهام لینکلن» طیاره‌داشییان گمی‌سینین ایران زوناسینا چاتدیغی واخت ترامپین وئردیی بو آچیقلاما واشینگتنون ایکی مرحله‌لی پلانینین اولدوغو فکرینی اؤنه چیخاریر.

ایلکین مرحله‌ده هدف دانیشیقلار ماساسین‌دا رژیمین تسلیم ائدیلمه‌سیدیر.

- ایران نووه پروگرامین‌دان، ائلجه ده پروکسی قوه‌لری دستکله‌مک‌دن امتنا ائدیر؛

- اؤلکه‌ده اداره‌چی‌لیک معین قدر اولسا دا، دونیوی سیستمه کئچیر، موجود رژیم ویتریندن چکیلیر؛

تهرانین قارشی‌سینا قویولان طلبلری بو کونتکستده قیمتلندیرمک اولار. ایران اطرافینا قوه‌لرین توپلانماسینین ایلکین هدفی ده رژیمی ماسادا تسلیم اولماغا مجبور ائتمکدیر. رسمی تهران حربی مداخیله‌نین قارشی‌سینی آلماق، ایرانین بوتؤولویونو ساخلاماق و رژیمین ایمیجینی خلاص ائتمک مقصدیله ماسایا ایلشه بیلر. هرچند، ایران رژیمینین کاراکتری آمریکاین رادیکال طلبلرینی قبول ائد‌جکلری احتمالینی آزال‌دیر، بو باخیم‌دان، «دیالوگ ایستکلری» داها چوخ زمان گازانماق مقصدی کیمی گؤرونور. بونو آنلایان واشینگتنون «دیالوگ و هجوم» تاکتیکاسینی تطبیق ائتمه‌سی ممکن‌دور:

آ) مذاکره‌لر باشلایا، ایران طلبلر قارشی‌سیندا تردد ائدجیی تقدیرده، ضربه‌لر ائندیریله بیلر؛

ب) ماسادا تردد ائد‌ن ایرانین تسلیم اولماسی اوچون ایلک هجوم کیچیک مقیاس‌لی اولا و کونکرت هدفلره – حربی-سیاسی رهبرلیک، ائلجه ده حربی ایستروکتورلار، یؤنه‌له بیلر؛

ج) ایرانا حربی مداخله‌نین مقیاسینین رژیمین سئچیمین‌دن – تسلیم اولماسی، یاخود مقاومت گؤسترمه‌سیندن آسیلی اولاجاغی گؤرونور: رژیمین دیره‌نمه‌سی گئنیش مقیاس‌لی هجومو شرطلندیره‌جک.

ایرانا گئنیش مقیاس‌لی مداخله سناری‌سینده پروکسی قوه‌لره قارشی پارالل عملیاتین کئچیریلجیی ده گؤزله‌نیلندیر.