خاریجی ایشلر ناظری جیحون بایراموو ایران‌لی همکاری عباس عراقچی ایله تلفن دانیشیغین‌دا آذربایجانین هوا مکانی و یا اراضی‌سینین ایرانا قارشی حربی عملیاتلار آپاریلماسی اوچون استفاده ائدیلمیجیینی بیلدیردی. رسمی باکی‌نین تهرانا بونو ایضاح ائتمه‌سی ضرورتی ایران‌دا اورتایا آتیلان ادعالاردان قایناقلانیر.

ایران بین‌الخالق موستویده تضییق دالغاسی ایله اوزلشنده تهران‌دا معین دایره‌لرین – محافظه‌کار قانادا باغلی اکسپرت و مئدیا رسورسلارینین آذربایجانی هدفه آلماسی عنعنه‌سی موجوددور. بو اتهاملار/ادعالار عادتاً ایکی مقصده خدمت ائدیر.

۱. گونئی‌لی سویداشلاریمیز آراسیندا آذربایجانین «دوشمن اوبرازینی» فورمالاشدیرماق؛

۲. دقتی ایران رژیمینین اوزه چیخان ضعیف‌لیکلریندن یاییندیرماق.

ایران اطرافین‌دا محاصره‌نین دارالماسی و حربی مداخله سناریسینین آکتواللاشماسی فونون‌دا آذربایجانا قارشی اتهاملار – اسرائیله دستک وئریلمه‌سی، ممکن محاربه‌ده پلاتفورما اولماسی کیمی عنعنوی ادعالار - یئنی‌دن گونده‌مه گلیب، لاکین بو دفعه داها آچیق تهدیدلرله. داها اؤنجه «باکی تهرانا هجوم‌دا اشتراک ائدیر» ادعالاری اساس تزیس کیمی استفاده اولونوردوسا، بو دفعه آذربایجانی هدفه آلماقدان بحث اولونور، خصوصیله انرژی اینفراستروکتورلارینین وورولماسی چاغیریشلاری ائدیلیر. باکی‌یا قارشی اتهام/ادعا کامپانییاسینین حده مرحله‌سینه کئچیدی ۱۲ گونلوک محاربه‌دن سونرا گئنیشلنیب. انرژی اینفراستروکتورونون وورولماسی تزیسی ده آذربایجانا دوشمن موقعی ایله تانینان ایران‌لی اکسپرت احمد کاظمی‌نین دیلی ایله گونده‌مه گتیریلدی.

- «آذربایجان ۱۲ گونلوک محاربه‌ده ایرانا هجوم‌دا اشتراک ائدیب»؛

- «اسرائیله «نفت ساتان» آذربایجانین انرژی ایستروکتورلاری قانونی هدفدیر»؛

- «آذربایجانین انرژی اینفراستروکتورونو وورماق هرمز بوغازینی باغلاماقدان داها افکتیودیر» و س؛

کاظیمینین تزیسلری ایرانین مختلف «اکسپرتلری» و مئدیا اورگانلاری طرفیندن یئنی‌دن تکرارلانیر، همچینین «آذربایجان ۱۲ گونلوک محاربه‌ده اولدوغو کیمی، یئنه اسرائیل اوچون پلاتفورما اولاجاق» فورماسیندا انکشاف ائتدیریلیر.

بو ادعالار/اتهاملار خصوصیله اسرائیلین خارجی ایشلر ناظری گیدئون سعرین باکی‌یا سفری فونوندا گونده‌مه گلدی، حالبوکی عینی عرفه‌ده ایران خارجیایشلر ناظرینین معاونی وحید جلال‌زاده ده آذربایجانا سفر ائتدی و اسرائیل‌لی ناظردن فرق‌لی اولاراق، تهدید دولو خبردارلیق سسلندیردی. جلال‌زاده‌نین باکی‌دا وئردیی بیاناتلارا رئاکسیا وئریلمه‌سه ده، ایران سفیرلیینین سعرین سفری حاق‌دا دئدیکلری تهرانین «تهدید دیلی»نی ایشه سالدیغینین نمونه‌لریندن بیری حساب اولونا بیلر.

اتهام/ادعالار ایندییه قدر داها چوخ ایران اجتماعی رای‌ینه حسابلانیردیسا، موجود سیتواسیادا مقصد فرقلی گؤرونور: ریتوریکانین پراکتیکی موستویده تطبیقی امکانلاری محدود اولسا دا، آذربایجانین انرژی اینفراستروکتورونون هدف کیمی گؤستریلمه‌سی ایله هم آوروپانین انرژی تهلوکسیزلیینی، هم نفت-گاز سکتورون‌دا خارجی اینوستورلارین تمثیل ائتدیکلری اؤلکه‌لری تهدید ائدیر، هم ده رئگیون اؤلکه‌لرینه «محاربه‌نین آرئالی یاییلا بیلر» مئساژینی وئریرلر؛ بونونلا آمریکا-این ممکن حربی موداخیله‌سینه قارشی «مجبوری عکس-مؤقع»نی گئنیشلندیرمه‌یه، واشینگتنون قرارینا کنار تأثیرلری آرتیرماغا چالیشیرلار؛

بو کونتکست‌ده رسمی باکی‌نین تهرانا وئردیی «آذربایجان پلاتفورما اولمایاجاق» مساژی ایران‌دا اورتایا آتیلان ادعالاردان و تهدیدلردن امتنا ائدیلمه‌سی ایله باغلی خبردارلیق، عینی زمان‌دا، قونشولوق پرینسیپلرینه صادقلیینی نمایش ائتدیرمکدیر. بونو پزشکیانین کمانداسینا ایضاح ائتمک ممکن‌دور، لاکین محافظه‌کار قانادین آذربایجانا قارشی عنعنوی ریتوریکاسینی دییشمک چتین گؤرونور.