اوکراینا پرزیدنتی ولادیمیر زلنسکی آذربایجان‌دا ایشگذار سفرده‌دیر.

آخار.آز خبر وئریر کی، آپرئلین ۲۵-ده قبله‌ده آذربایجان رسپوبلیکاسینین پرزیدنتی ایلهام علیئوین اوکراینا پرزیدنتی ولادیمیر زلنسکی ایله تک‌به‌تک و گئنیش ترکیب‌ده گؤروشو اولوب.

صحبت زامانی دولتیمیزین باشچی‌سینین ولادیمیر زلنسکی ایله اولکی گؤروشلری ممنونلوقلا خاطیرلاندی، اوکراینا پرزیدنتینین اؤلکه‌میزه بو سفرینین ایکیطرفلی امکداشلیق مسئله‌لرینین مذاکیره‌سی اوچون یاخشی امکان یاراداجاغینا امینلیک بیلدیریلدی. امکداشلیغین بیر چوخ استقامت‌ده، او جمله‌دن انرژی ساحه‌سینده گئنیشلندیریلمه‌سینه دایر فیکیر مبادیله‌سی آپاریلدی، کند تصروفاتی ایله باغلی امکداشلیق مسئله‌لری مذاکیره اولوندو، حوکومتلرآراسی کومیسسییانین فعالیتینه توخونولدو.

اؤلکه‌میزین اوکراینایا هومانیتار دسته‌یینی، عینی زاماندا، آذربایجان دولتی طرفیندن اوکراینالی اوشاقلارا اولان دقت و قایغینی یوکسک قیمتلندیره‌ن قوناق بوتون بونلارا گؤره پرزیدنت ایلهام علیئوه میننتدارلیغینی بیلدیردی. تئزلیکله بیر گروپ اوکراینالی طلبه‌نین رئابیلیتاسییا مقصدیله، همچینین آذربایجانین مدنیتی و اینجه‌صنعتی ایله تانیش اولماسی اوچون اؤلکه‌میزه سفرینین نظرده توتولدوغو وورغولاندی.