ایرانین کشفیات ناظیرلیی آذربایجانین دولت تلویزیا کانالینی دا داخل ائتدیی «دشمن مدیا قوروملاری» ایله باغلی سیاهی‌سینی ایولون ۲۳-ا یاییملاییب. یعنی آذ ت.و ایله ایسته‌نیله‌ن فورمادا امکداشلیق ائد‌ن، معلومات، فوتو، ویدئو و یا دیگر ماتریاللار گؤندرن ایران وطنداشلاری «جاسوسلوغا و صهیونیست رژیمله امکداشلیغا گؤره جزانین سرتلشدیریلمه‌سی حاقیندا قانونون» ۴-جو مادده‌سی چرچیوه‌سینده جنایت مسئولیتینه جلب اولوناجاقلار.

Axar.az خبر وئریر کی، بو سؤزلری پولیتولوق ائلخان شاهین‌اوغلو قید ائدیب.

«سیاهی‌دا گونئی آذربایجان تلویزیاسی دا وار و ایران وطنداشلاری اساساً گوناز ت.و-یه شکل و ویدئو گؤندریر، شرحلر وئریرلر. بونا باخمایاراق، ایرانین کشفیات ناظیرلیگی آذ ت.و-نی سیاهییا محض اونا گؤره علاوه ائدیب کی، بو، آذربایجان دولتی علیه‌اینه آتیلمیش آددیم کیمی قیمتلندیریلسین.

بو قراردان بیر نئچه گون سونرا اردبیلده "شیخ صفی‌الدین اردبیلینین خاطره گونو" و "اردبیل هفته‌سی" کئچیریلیب و همین تدبیرده ملی مجلسین ملت وکیلی جیحون محمدوو، آذربایجان ملی علملر آکادمیاسینین پرزیدنتی عیسی حبیبیلی و مدنیت ناظیرینین معاونی فرید جعفروو اشتراک ائدیبلر. حالبوکی، ایرانین کشفیات ناظیرلیی آذربایجان علیه‌اینه قراری یاییملادیقدان سونرا سفر تاخیره سالینا بیلردی. تدبیرلر زمانی اونلارا «سحر» کانالینین میکروفونلاری اوزادیلیب و تمثیلچیلریمیز تدبیر، او جمله‌دن ایکی اؤلکه آراسینداکی مناسبتلر باره‌ده فکرلرینی بیلدیریبلر.

توتاق کی، اوخشار مدنیت تدبیری باکیدا کئچیریلیر و همین تدبیره ایران رسمیلری، علم آداملاری و ملت وکیللری دعوت اولونورلار. همین شخصلر ده اونلارا اوزانان آذ ت.و میکروفونلارینا فکرلرینی بیلدیریر، شرح وئریرلر. ماراقلیدیر، همین شخصلر اؤلکه‌لرینه قاییتدیقدان سونرا ایرانین کشفیات ناظیرلیی اونلارا قارشی جنایت ایشی آچارمی؟»، - پولیتولوق وورغولاییب.