تهرانین باکی‌یا قارشی گؤزلنیلمه‌دن بو آددیمی آتماسی بیر داها بو مهم سوالی گونده‌مه گتیریر: ایرانین شمال قونشوسو ایله باغلی خارجی سیاستی هانسی بیین مرکزیندن اداره اولونور؟

بو سؤزلری Axar.az-آ آچیقلاماسین‌دا گونئی‌لی فعال، سیاسی مشاهده‌چی علیرضا زمانی دئییب.

اونون سؤزلرینه گؤره، ایران کشفیات ناظرلییی (اطلاعات) طرفین‌دن آذربایجانین دولت تلویزیاسینین (آذ.تی.وی) "دشمن مئدیا" سیاهی‌سینا سالینماسی ایرانین حاکمیت ایستروکتورونداکی ایکی فرقلی باخیشین قارشی‌دورماسینی گؤستریر:

«حقیقت بودور کی، ایرانین قراروئریجی ایستروکتوروندا قونشو اؤلکه‌لرله مناسبتلره یالنیز تهدید، گوج و گئوسییاسی قیرمیزی خطلر پریزماسیندان باخان بیر گروپ وار. بو گروپ اوچون جنوبی قفقاز بیر ترانزیت امکانی دئییل، هر آن پارتلایا بیله‌جک کشفیات میناسی ساحه‌سی‌دیر.

اونلار آذ.تی.وی-نین ایران‌داکی آذربایجان‌لیلارین ملی مسئله‌لری ایله باغلی پروگراملارینی بیرباشا ملی تهلوکه‌سیزلییه تهدید کیمی قیمتلندیریرلر. رسمی دولت مئدیاسینی قارا سیاهی‌یا سالماق کیمی کسکین قرارلار محض بو دایره‌لرده حاضرلانیر. بو جور آددیملار بلکه قیسا مدت‌ده قارشی طرفه مئساژ وئرمک مقصدی داشیییر، لاکین اوزون مدت‌لی پرسپکتیوده اؤلکه‌نین ملی ماراقلارینا آغیر ضربه وورور».

علیرضا زمانی حساب ائدیر کی، بو گروپلاشمایا عکس طرف‌ده حکومتین دیپلماتیک و اقتصادی کورپوسو دایانیر:

«اونلار اؤلکه‌نین ایستراتژی ماراقلارینی و سیاسی موجودلوغونو ترانزیت یوللارین آچیلماسیندا و سرحدلرده ثابیتلیین قورونماسیندا گؤرورلر. بو گروپ اوچون "شمال-جنوب" دهلیزی واسطه‌سیله هر ایل میلیونلارلا تن یوکون داشینماسی، آراز چایی اوزرینده‌کی مشترک سو بندلری لایحه‌لری و باکی ایله رابطه کاناللارینین آچیق ساخلانیلماسی کشفیات قوروملارینین اموسیونال قرارلارینا قربان وئریلمه‌مه‌لی اولان حیاتی پریوریتتلردیر. بو ایکی پارالل یاناشمانین توققوشماسی تهران-باکی مناسیبتلرینی چتین دوره‌یه سالیب.

نه واخت دیپلوماتیک کورپوس بؤیوک سعیلرله سفیرلیکلرین فعالیتینی برپا ائدیر و سرحد لایحه‌لرینی حرکته گتیریرسه، تهران‌داکی تهلوکه‌سیزلیک یؤنوملو قوروملارین قفیل بیر قراری (آذ.تی.وی-نین قارا سیاهییا سالینماسی کیمی) دیپلماتییانین اوغورلارینی یئنی‌دن صیفیرلاییر.

تهران‌دا قونشو اؤلکه‌لرله باغلی واحد ایستراتژی مؤقع فورمالاشمایانا و تهلوکه‌سیزلیک اورگانلارینین کؤلگه‌سی اقتصادی و ترانزیت لایحه‌لرین اوزریندن چکیلمه‌یه‌نه قدر باکی ایله مناسبتلر «گرگینلیک، موقتی یومشالما و یئنی‌دن گرگینلیک» دایره‌سین‌ده قالاجاق. بو گون ایرانین ملی ماراقلاری اؤلکه‌نی داها دا تجرید ائد‌ن تهلوکه‌سیزلیک یاناشمالارینا دئییل، دیپلماتیک راسیوناللیغا و اقتصادی اینتگراسیایا داها چوخ احتیاج دویور».