صنعی اَنتِلِکتین انکیشافی ایله باغلی گلن خبرلر آرتیق ساده‌جه "یئنی بیر پروگرام" موضوعسون‌دان چیخیب، "اکزیستنسیال تهلوکه" مذاکیره‌سینه چئوریلیب.

بو سؤزلری Axar.az-آ آچیقلاماسیندا "آذربایجان سیبررتهلوکه‌سیزلیک تشکیلاتلاری آسسوسیاسییاسی" اجتماعی بیرلیینین اکسپئرتی فرید موسی‌یئو صنعی اَنتِلِکتین تهلوکه‌لری باره‌ده دانیشارکن دئییب.

اکسپرتین سؤزلرینه گؤره، صنعی اَنتِلِکتین تهلوکه‌لی حساب ائدیلمه‌سینین بیر نئچه سببی وار.

"بو، ساده‌جه روبوتلارین دنیانی اله کئچیرمه‌سی کیمی بدیعی فیلملرین موضوع‌سو دئییل، جدی علمی و تکولوژی پروبلئملردیر.

۱. "اویغونلاشدیرما" پروبلئمی: بو، ان بؤیوک ریسک‌دیر. اگر بیز صنعی اَنتِلِکته چوخ مرکب بیر مقصد وئرسک و اونون مقصدلری انسان دیرلری، اتیک نورمالاری و یا ساغ قالما اینستینکتی ایله تام اوست-اوسته دوشمه‌سه، صنعی اَنتِلِکت همین مقصده چاتماق اوچون انسانلیغا ضرر وئره‌ن "منطیقی" یوللار سئچه بیلر.

۲. "قارا قوطو" اففکتی: معاصر صنعی اَنتِلِکت مدللری او قدر مرکب‌دیر کی، حتی اونلاری یارادان مهندیسلر ده مدلین معین بیر قراری نیه و نئجه وئردیینی تام ایضاح ائده بیلمیرلر. نظارت ائده بیلمه‌دیینیز بیر گوج تهلوکه‌لی اولا بیلر.

۳. سوسیال و اقتصادی کائوس: کوتلوی ایشسیزلیک، درین ساختاکارلیق، دئزینفورماسییا و سیبر-ساواشلار آرتیق اوزاق گله‌جک دئییل. صنعی اَنتِلِکت واسطه‌سیله مانیپولیاسییا ائدیلن جمعیتلر و سارسیلان اقتصادیاتلار رئال تهلوکه‌دیر".

اکسپرتین فیکرینجه، دنیا بو مسئله‌ده بؤلونموش وضعیت‌ده‌دیر:

"تهلوکه‌سیزلیک طرفدارلاری: بو دوشونجه‌یه گؤره، بیز صنعی اَنتِلِکتین انکیشافینی یاواشلاتمالی و اونون اداره اولونماسی، ائتیک قایدالاری و تهلوکه‌سیزلیک پروتوکوللاری اوزرینده ایشلمه‌لیییک. حساب ائدیلیر کی، تهلوکه‌سیزلیک تام تامین اولونمادان آتیلان هر سرعتلی آددیم انسان‌لیق اوچون گئریدؤنمز بیر اوچوروم اولا بیلر.

دیگری ایسه انکیشاف طرفدارلاری: بو طرف ایسه حساب ائدیر کی، تکنولوژینی دایاندیرماق ممکن دئییل و بو، رقابتی آرتیراجاق. دوشونولور کی، تهلوکه‌سیزلیک یالنیز رئال تجربه و داواملی انکیشاف پروسسی زامانی اؤیره‌نیله بیلر. یعنی، بیز هم انکیشاف ائتمه‌لی، هم ده عینی زامان‌دا تهلوکه‌سیزلیک مکانیزملرینی قورمالیییق.

نتیجه‌ده انسان‌لیق اوچون بالانسین آختاریشینی تامین ائتمه‌لیییک.

متخصصلرین اکثریتی آرتیق اوچونجو بیر یولون واجیبلیینی وورغولاییر. بو او دئمک‌دیر کی، صنعی اَنتِلِکته آرتیق "یارادیلیب، سونرا تهلوکه‌سیزلیک علاوه ائدیلسین" پرینسیپی ایله دئییل، "هر بیر کد ستری و هر بیر یئنی مدل تهلوکه‌سیزلیک و اتیکا فیلترلری داخیلینده اینشا ائدیلسین" پرینسیپی ایله یاناشیرلار.

صنعی اَنتِلِکت بیزیم ان بؤیوک کمکیمیز اولا بیلر، لاکین بو، یالنیز اونون نظارت آلتیندا و انسان دیرلرینه صادق قالماسی شرطیله ممکن‌دور".

قید ائدک کی، ب‌ام‌ت ده صنعی اَنتِلِکتین انکیشافی ایله باغلی ریسکلری رئال ساییب و اونلارین قارشی‌سینین آلینماسی اوچون تعجیلی تدبیرلر گؤرولمه‌لی اولدوغونو بیلدیریب.