اصلا جنوبی آذربایجاندان اولان، بؤیوک بریتانیانین مشهور موغه‌ننی‌سی سامی یوسیف «قاراباغیمسان» آدلی موسیقی کومپوزیسییاسینی تقدیم ائدیب.

Kult.az خبر وئریر کی، موغه‌ننی بونونلا باغلی سوسیال مدیا حسابلاریندا پایلاشیم ائد‌رک، اثرین رسمی آودیو یازیسینین بئش ایللیک گؤزلنتیدن سونرا، نهایت، دینله‌ییجیلره تقدیم اولوندوغونو قید ائدیب:

"حیاتین سئوینج و کدرلری ایله باش ائتمیین یگانه یولونو موسیقی‌ده گؤرورم. قاراباغدا محاربه باشلایاندا من ده اؤز حسلریمی بو اثرله ایفاده ائتدیم.

بو اثر قاراباغین انسانلارینا و او گؤزل دیارا عنوانلانمیش سئوگی مکتوبو، سئوگی نغمه‌سیدیر. بولبوللر دیاری اولان بو تورپاق آذربایجان موسیقی‌سینه ان بؤیوک سسلریندن بیر چوخونو بخش ائدیب.

اثرین سؤزلری استعدادلی آیتن ایسمیخانووایا مخصوصدور. بو اثرین روحونو و قلبینی اؤزونده داشییان سؤزلره گؤره آیتنه تشکور ائدیرم!

اثری کووید-۱۹ پاندمیاسی دؤورونده تمامیله مسافه‌دن یازدیق. موسیقی‌چیلر و خور عضولری مختلف گونلرده و گئجه‌لرده اؤز ایفالارینی لنته آلدیلار. اونلارین بیر چوخو دولت فیلارمونیاسینین عضولری، دیگرلری ایسه عنعنوی آذربایجان موسیقی آلتلرینین تانینمیش اوستالاریدیر.

بوتون بو آیری-آیریلیقدا یازیلمیش ایفالاری بیر آرایا گتیره‌رک واحد، جانلی و بوتؤو بیر اثر یاراتماق اولدوقجا بؤیوک زحمت طلب ائدیردی. بیز چتینلیکلره سینه گردیک و بیرلیکده عرصه‌یه گتیردییمیز ایشله غرور دویورام.

بو اثری سفاریش ائد‌ن آذربایجان رسپوبلیکاسینین مدنیت ناظیرلیینه، خصوصیله ده لاییحه‌نین اساس حرکت‌وئریجی قوه‌سی اولان پروفسور سئودا ممدلیئوایا صمیمی تشکورومو بیلدیریرم.

همچنین اؤز صنعتکارلیقلارینی بو اثره بخش ائد‌ن بوتون استعدادلی موسیقی‌چیلره و سولیستلره منتدارام. سیز اولماسایدینیز، بو موسیقی هئچ واخت حیاتا وثیقه قازانا بیلمزدی.

سون اولاراق، لاکن هئچ ده آز اهمیت داشیمایان بیر تشکورومو قاراباغین دؤزوملو و بؤیوک اورکلی انسانلارینا، ائلجه ده آذربایجانین بوتون خالقینا عنوانلاییرام. فداکارلیقلارینیزا و حاق اولان اوغروندا سارسیلماز مبارزه‌نیزه گؤره سیزه تشکور ائدیرم. بو ماهنی سیزه مخصوصدور! سئوگی و منتدارلیقلا... "