اوزون ایللر عرضینده اردو قوروجولوغو، سلاحلی قوه‌لرین پئشه‌کارلیغینین آرتیریلماسی، منتظم اولاراق حربی تعلیملرین کئچیریلمه‌سی، دؤیوش قابلیتینین آرتیریلماسی، اردونونن معاصر تکنیکا ایله، سلاحلارلا تجهیز ائدیلمه‌سی عامللری غلبه‌نین قازانیلماسیندا بؤیوک رول اویناییب.

Axar.az خبر وئریر کی، بو باره‌ده آذربایجان پرزیدنتی ایلهام علیئوین ظفر گونو مناسبتیله خانکندیدن خالقا مراجعتینده دئییلیب.

"اما غلبه‌یه آپاران اساس یول خالقین، عسگر و ضابطلرینین اورییندن کئچیب. بیزی ایر‌لییه آپاران یول لیاقت یولو ایدی. آذربایجان خالقی هئچ واخت اشغاللا باریشماق فکرینده دئییلدی. من اشغال دؤورونده دفعه‌لرله مختلف تدبیرلرده آچیق بیان ائدیردیم کی، آذربایجان اشغاللا باریشمایاجاق. باخمایاراق کی، ارمنستانین آرخاسیندا دایانان اؤلکه‌لر بیزی بو اشغاللا باریشدیرماق ایسته‌ییردیلر. دفعه‌لرله بیلدیریردیلر کی، بو مناقشه‌نین حربی حلی یوخدور. دفعه‌لرله بیزی قبول‌ائدیلمز گذشتلره سوق ائتمک اوچون مختلف فتنه‌لر تؤردیردیلر. آذربایجانا قارشی آپاریلان گئنیش‌مقیاسلی قارایاخما، شر-بهتان کامپانییاسی، آذربایجان دولتینی، خالقینی و رهبرلیینی گؤزدن سالماق اوچون قورولان بوتون تخریباتلار هئچ بیر نتیجه وئرمه‌دی. من دفعه‌لرله بیلدیریردیم کی، بیز هئچ واخت اشغاللا باریشمایاجاغیق، اگر ارمنستان اشغال ائدیلمیش تورپاقلاردان اؤز خوشو ایله چیخماسا، بیز حربی یوللا اراضی بوتؤولویوموزو برپا ائدجه‌ییک"، - پرزیدنت بیلدیریب.