اؤتن ایلده‌ن باشلایان و هله ده فرقلی یؤنلرده داوام ائد‌ن اعتراضلارین ان اؤنده گئدنی قادینلار، اؤزللیکله گنج قیزلار اولموشدو. ایران اسلام انقلابین‌دان سونرا قادینلارین بئله بؤیوک اعتراضلاردا ایشتیراکی گؤرونمه‌ییب. ایران حکومتی یاخشی بیلیر کی، رژیمین دورومو گئتدیکجه پیسلشیر. اؤنوموزده‌کی گونلرده یئنی‌دن اعتراضلار اولاجاق. بو اعتراضلارین ایلک سببلریندن بیری ده قادینلارین اؤزگورلویو، اؤزللیکله باش اؤرتویو مسئله‌سیدیر.

بو سؤزلری Axar.az-آ آچیقلاماسین‌دا گونئی آذربایجان میللی اویانیش حرکاتی صدرینین کؤمکچی‌سی (گاموح)، ایران اوزره اکسپرت الیار تورکر دئییب.

آرتیق گنجلیین اویاندیغینی دئیه‌ن اکسپرت اونلارین اؤز حاقلارینی یاخشی بیلدیکلرینه دقت چکیب:

«اینسانلار، خصوصیله ده قیزلار دونیاداکی اینکیشافی و دیگر قادینلارین نئجه راحت یاشادیغینی گؤرورلر و اؤز حاقلارینا صاحب چیخماق فیکرینددیرلر. اما ایران ملا رژیمی ائله بیر سیستم قوروب کی، قادینلارین آزادلیغی ملالارین ییخیلماغی دئمکدیر. بو ایللر عرضین‌ده ملالار قادینلارین حاقلارینی تاپدالاماقلا، اؤزلرین ایر‌لی آپاریب. مینبره چیخیب همیشه قادینلاردان دانیشیبلار. مسجیده و هر یئرده اساس مؤوضوع قادینلار اولوب. اونلارین حاقلارینی گؤرمزدن گلیبلر، باش اؤرتوکلرینه قاریشیبلار. بو گونلری قادین حاقلاری تانینارسا، دئمک کی، ملالیق دا بیتمیشدیر».

اونون سؤزلرینه گؤره، ایران‌دا قیز اوشاقلارینین کوتلوی شکیل‌ده زهرله‌نمه‌سی قادین حاق و آزادلیقلارینین بوغولماسی کیمی قبول ائدیلمه‌لیدیر:

«رژیم یاخشی آنلاییر کی، نؤوبتی اعتراضلاردا قیزلارین رولو بؤیوک اولاجاق. هم قیزلاردان اؤتن آیلارداکی اعتراضلارین حیفینی آلیر، هم ده اوستلرینه بو شکیل‌ده گئده‌رک، گؤزلرینی قورخوتماق ایستییر. اونلارین اؤنوموزده‌کی اعتراضلارا قاتیلماسینا انگل اولماق ایستییرلر. انقلابدان سونرا «قادینلارین آزادلیغینا مانع اولمایاجاغیق» دئسه‌لر ده، ایلک ایشلری باشی آچیق قادینلارین، یا دا ساچی بیر بالاجا گؤرونه‌ن خانیملارین آلنینا اینه باتیرماق اولدو. یعنی، بو رژیم گلدیی گوندن قادینلارا مخالیف اولوب، اونلارا ایشگه‌نجه‌لر وئریب. بو گون ده بو پروسس داوام ائدیر. اونا گؤره ده امینه‌م کی، اؤنوموزده‌کی آیلاردا اعتراضلار قاچیلماز اولاجاق. بو اعتراضلارین باشیندا ایسه قادینلار دایاناجاق. اودور کی، قم‌دان باشلایاراق، ایرانین بیر چوخ شهرلرینده خصوصی گازلا قیزلاریمیزی زهرله‌مه‌یه چالیشیرلار. اونلارین مکتبه گئتمه‌سینین اؤنونو کسمک و عائله‌لرین گؤزونو قورخوتماق فیکرینده‌دیلر. اما بو ترس تپه‌جک و رژیمین اؤز علیهینه ایشله‌یه‌جک».

قید ائدک کی، سون گونلر ایراندا مختلیف شهرلرده و مکتبلرده یوزلرله قیز شاگیرد زهرلنیب. بیر چوخلاری بونو رژیمین قصداً ائتدیینه اینانیر.