گونئی آذربایجانین بیر چوخ شهرلرینده ملی فعاللاریمیز خرداد قیامینین ایلدؤنومو اوچون اون گوندور یورولمادان چالیشیرلار. بو ایسه رژیمی جدی معنادا ناراحات ائدیر.

بو سؤزلری Axar.az-آ گونئی آذربایجان ملی اویانیش حرکاتی (گاموه) اداره هیئتینین عضوو آغری قاراداغلی اؤتن گون ملی فعاللارین ساخلانیلماسی ایله باغلی خبرلری شرح ائدرکن دئییب.

او بیلدیریب کی، تهران رژیمی خالقین بیر یئره توپلاشماسیندان قورخویا دوشدویو اوچون ملی فعاللارین ساخلانیلماسی پلانینی ایشه سالیب:

«گونئی آذربایجان سیاسی تشکیلاتلاری «خرداد قیامینی اونوتمایاق» مضمونلو بروشورلر یایاراق بیر سیرا شهرلرده فعالیت گؤسترمه‌یه باشلادی. ملی آزادلیق حرکاتینین آغساققاللاری ایله مصلحت‌لشه‌رک قرار وئردیک کی، تبریز و بیر نئچه ایری شهرده ۱ خرداددا آکسیالار کئچیرک. شهیدلریمیزین خاطره‌سینی یاد ائدک. بوندان ناراحات اولان رژیم خالقی نظارتده ساخلاماق اوچون باسقیلاری آرتیرماغا، تانینمیش ملی فعاللاری و بیر سیرا شخصلری توتماغا باشلاییب. داوود شیری، همزه ولیزاده، روح‌الله احمدی‌نژاد، جواد احمدزاده و علیرضا صبری ماین ۱۸-ی آخشام ساعتلارین‌دا ساخلانیلیب. توتمادیقلاری فعاللارا ایسه تلفونلا زنگ ائد‌رک، حده-قورخو گلیبلر.

اونلارا خبردارلیق ائدیبلر کی، ماین ۲۲-ده ائولریندن چؤله چیخماسینلار. رژیم چالیشیر کی، خرداد قیامینین آنیم گونونده کوچه‌لرده هئچ بیر توپلاشما و کوتلوی تدبیر اولماسین».

قاراداغلی بیلدیریب کی، تهراندا «تراکتور»-«استقلال» قارشیلاشماسی زمانی استادیوندا بوتؤو آذربایجان بایراغینین قالدیریلماسی رژیمی داها جدی تدبیرلر آلماغا سؤوق ائدیب:

«تهرانین آزادی استادیونوندا باش توتان «تراکتور»-«استقلال» اویونوندا بوتؤو آذربایجان و گونئی آذربایجان بایراغی قالدیریلدی. همچینین، ملی شعارلار سسلندیریلدی. «تراکتور»اون طرفدارلاری توتولدو، بعضیلرینه فیزیکی گوج تطبیق اولوندو. تهران رژیمی ده بیلیر کی، اویون بهانه‌دیر و اساس مقصد ملی شعارلارین سسلندیریلمه‌سیدیر. اونلار دا آنلاییر کی، بو کوتله خرداد قیامینین ایلدؤنومونده کوچه‌لرده اولا بیلر. اودور کی، اولجه‌دن تدبیرینی آلیر».
آغری قاراداغلی ملی فعاللارین حیاتی اوچون تهلوکه‌لرین اولا بیلجیینه دقت چکیب:

«بو باسقیلار بیزیم ملی فعاللاریمیز اوچون آغیر نتیجه‌لره سبب اولور. سون اعتراضلاردان سونرا ایران داها چوخ قورخویا دوشوب. حرکات‌چیلارا اوزون‌مدتلی حبس جزالاری وئریلیر. توتولمایانلار ایسه اگر طلبه‌دیرسه، اونیورسیتئدن قووولور، یاخود ایش یئرلریندن اوزاقلاشدیریلیر. بو، معین معنادا ملی فعاللاریمیزین ایشینی آشکاردا دئییل، گیزلینده ائتمه‌سینه سبب اولور. بو قدر باسقییا رغما فعاللاریمیز گئری چکیلمیر».

خاتیرلاداق کی، ۲۰۰۶-جی ایل ماین ۱۲-ده «ایران» رسمی قزئتینده ۳۵ میلیوندان چوخ آذربایجان تورکونو حشرات کیمی تصویر ائد‌ن تحقیرامیز کاریکاتورا درج ائدیلیب. بو حادثه گونئی آذربایجاندا کسکین اعتراضلا قارشیلانیب و آذربایجانلیلار یاشادیقلاری شهر و قصبه‌لرده اعتراض آکسیالارینا باشلایبلار.

تهلوکه‌سیزلیک قوه‌لری تهران، زنجان، تبریز، اورمیا، اردبیل، اهر، همدان، کلیبر، موغان، میانه، ماراغا، خوی، سالماس، خیاو، قوشاچای، سولدوز و مرند شهرلرینده تشکیل ائدیلن نمایشلره مداخله ائدیب. رسمی معلوماتلارا گؤره، دینج آکسیاچیلارا آتش آچیلماسی نتیجه‌سینده آزی ۳۰ نفر اؤلدورولوب، یوزلرله انسان یارالانیب.

گونئی آذربایجانلی فعاللار ایسه بیلدیریرلر کی، حادثه‌لر زمانی ۵ میندن آرتیق اعتراضچی حبس ائدیله‌رک، ایشگه‌نجه‌یه معروض قالیب، ۲۰۰ نفره یاخین شخص اؤلدورولوب و یا ایتکین دوشوب.

هر ایل آذربایجانلیلار و خصوصیله ده گونئی آذربایجان فعاللاری دنیانین هر یئرینده ۱ خرداد حادثه‌لری زمانی هلاک اولانلارین خاطره‌سینی یاد ائدیرلر.