ملی-معنوی دیرلریمیز، آذربایجان دیرلری بیزیم اوچون هر شیدن اوستوندور.

Axar.az خبر وئریر کی، بو باره‌ده آذربایجان پرزیدنتی ایلهام علیئوین ظفر گونو مناسبتیله خانکندیدن خالقا مراجعتینده دئییلیب.

پرزیدنت بیلدیریب کی، آذربایجانی ایر‌لییه آپاران ملی-معنوی دیرلریدیر:

"آذربایجان دولتی بو تمل اوزرینده قورولوب. عصرلر بویو بیز بو دیرلری قلبیمیزده یاشاتمیشیق، قوروموشوق و گله‌جک نسللره امانت کیمی وئرجییک. آذربایجانچی‌لیق مفکوره‌سی بیزیم بوتون اوغورلاریمیزین تملینده دایانان فلسفه‌دیر. آذربایجانچی‌لیق بوتون وطنداشلاریمیزی بیرلشدیرن فلسفه‌دیر. آذربایجانچی‌لیق بیزی ایر‌لییه آپاران مفکوره‌دیر. آذربایجاندا بوتون ائتنیک گروپلار، بوتون دینلرین نماینده‌لری بیر عائله کیمی یاشاییر و بیزی بیرلشدیرن وطنداشلیق، همرایلیک و آذربایجانچیلیق مفکوره‌سیدیر. بو، بیزیم ملی ایدئیامیزدیر. بیر داها دئمک ایسته‌ییرم کی، بو، گله‌جه‌یه آپاران یولدور. بو گون آذربایجاندا حکم سورن اجتماعی-سیاسی ثابتلیک، خوش اوقات، قوروجولوق میللری و جمعیتیمیزین واحد آمال اوغروندا بیرلشمه‌سی، حساب ائدیرم کی، بوگونکو دنیادا آز-آز راست گلینه‌ن منظره‌دیر".

ایلهام علیئو بو گؤزل بایرام گونونده بیر داها آذربایجان خالقینین نه قدر بؤیوک خالق اولدوغونو قید ائتمک ایستدیینی وورغولاییب:

"چونکی آنجاق بؤیوک خالق عذاب-اذیتلره باخمایاراق، ۳۰ ایللیک اشغالا باخمایاراق، - باخمایاراق کی، ارمنستانین آرخاسیندا دایانان بؤیوک دولتلر بیزی هدله‌ییردی، - اراده گؤستردی و منه دستک وئره‌رک غلبه‌میزی شرتلندیردی. بو گؤزل بایرامی قید ائدرکه‌ن هر بیریمیز حاقلی اولاراق غرور حسی کئچیریریک. عینی زمان‌دا، هر بیریمیز بو یولدا جانلاریندان کئچمیش شهیدلریمیزین عزیز خاطره‌سینی حرمتله یاد ائدیریک. امینه‌م، هر بیریمیز اؤزوموزه دئییریک: بیز ائله گوجلو اولمالییق کی، بوندان سونرا آذربایجانا ضرر وئرمک هئچ کیمین آغلینا بئله گلمه‌سین! امینه‌م کی، بئله ده اولاجاق. بو گون آذربایجان گوجلو دولتدیر، هم سیاسی، هم اقتصادی، هم حربی نقطه‌ایی-نظریندن هئچ کیمدن آسیلی اولمایان دولتدیر، مستقل سیاست آپاران دولتدیر و لیاقتلی دولتدیر".