«داغلیق قاراباغ»این کئچمیش «دولت ناظری» روبن واردانیانین روسیا وطنداشلیغیندان امتناسی اونون شخصی سئچیمی‌دیر. بو، روسیا پاسپورتونون نئجه قیمتلی اولدوغونا شبهه ائد‌نلر اوچون یاخشی نمونه اولا بیلر.

Axar.az خبر وئریر کی، بو سؤزلری روسیا فدراسیا شوراسینین کونستیتوسییا کمیته‌سینین عضوو آلکساندر باشکین دئییب.

او بیلدیریب کی، روسیا وطنداشلیغیندان امتنا ائتدیی اوچون واردانیان روسیادان یاردیم آلا بیلمه‌یه‌جک:

«وطنداشلیقدان امتنا ائتمک کؤنوللو سئچیم ایدی، بونا گؤره ده بو آددیمین بوتون حقوقی نتیجه‌لری اونون سئچیمی‌دیر. دوشونورم کی، اونون وطنداشلیقدان کؤنوللو چیخماسینین حقوقی نتیجه‌لری اولاجاق. اونا گؤره کی، ایندی روسیا فدراسیاسیندان یاردیم آلا بیلمیر و آلمایاجاق دا».

او قید ائدیب کی، بو وضعیت روسیا وطنداشلیغینین قیمت‌سیزلیینه شبهه ائد‌نلر اوچون یاخشی نمونه‌دیر:

«کیمه‌سه دوغوشدان طالعیین هدیه‌سی کیمی بو جور شانس وئریلیر. بو، بیر داها طالعیین، دوغوشون، آتا-آنانین بخش ائتدیینین قدرینی بیلمیین لازم اولدوغوندان خبر وئریر».

قید ائدک کی، روبن واردانیان بو گون «لاچین» پستوندان ارمنیستانا کئچمک ایستیرکه‌ن ساخلانیلیب. کرملین مطبوعات کاتبی دمیتری پسکوو واردانیانی «یالنیز روسیا وطنداشلیغی اولاجاغی حالدا» مدافعه ائد‌جکلرینی بیلدیرمیشدی. بللی اولدو کی، واردانیان روسیا وطنداشلیغیندان رسما امتنا ائدیب و اونون وطنداشلیقدان چیخاریلماسی ایله باغلی پرزیدنت پوتین ۲۰۲۲-جی ایلین دکابریندا فرمان امضالاییب.