قازاخ رایونونون ارمنستانین اشغالی آلتیندا قالان کندلرینده فعالیت گؤستره‌ن «دؤیوش قارداشلیغی» قانونسوز بیرلشمه‌سینین عضوو آوئتیس آوئتیسیان حبس ائدیلیب.

Axar.az خبر وئریر کی، بو باره‌ده بیرلشمه معلومات یاییب.

همچینین بیرلشمه‌نین دیگر عضوو هرانت دئر-آبراهامیانلا دا علاقه‌نین کسیلدیی، اونون دا ساخلانیلدیغی احتمال اولونور.

آ. آوئتیسیانین مارتین ۲۴-او سحر ساعتلاریندا عملیاتلا حبس ائدیلدیی آچیقلانیب. بیرلشمه قازاخین اشغالدا اولان کندلرینین آذربایجانا تحویل وئریلمه‌سینه مانع اولماغا چالیشدیقلارینی، لاکین ارمنستان حکومتینین اونلارا قارشی چیخدیغینی قید ائدیب.

معلوماتا گؤره، «دؤیوش قارداشلیغی» کندلرین تحویل وئریلمه‌مه‌سی اوچون انسانلاری محاربه‌یه سسله‌ییر، تاووش-قازاخ سرحدینده دئمارکاسییا پروسئسی‌نین اجراسی زامانی آذربایجان اوردوسونا قارشی تخریبات تؤرتمه‌یی پلانلاشدیریر. اونلار بو گون عرضینده قازاخین یوخاری اسکی‌پارا و باغانیس-آیریم کندلرینه داخیل اولماغا حاضیرلاشدیقلارینی آچیقلاییبلار. ایروان ایسه آرتیق بیر مدت‌دیر بیرلشمه‌نین تخریبات پلانلاری و اجتماعی چاغیریشلاریندان خبرداردیر. بو سببله تخریباتا مانع اولماق و کندلرین پروبلئم‌سیز تحویل وئریلمه‌سی اوچون بیرلشمه‌نی ضررسیزلشدیرمه‌یه چالیشیر.

آرتیق «دؤیوش قارداشلیغی»نین بیر نئچه عضوونه ارمنستان حقوق-محافظه اورقانلاری طرفیندن خبردارلیق ائدیلیب. حبس اولونان آ. آوئتیسیان و هرانت دئر-آبراهامیان ایسه بیرلشمه‌نین اساس عضولریندن اولوبلار.

قید ائدک کی، بوندان اؤنجه «دؤیوش قارداشلیغی» مارتین اولین‌ده قازاخین ارمنستانین نظارتینده اولان یوخاری اسکی‌پارا کندینه گیرجه‌یینی آچیقلامیشدی.