آمریکالی سیاسی شرح‌چی ساموئل کروگرین Axar.az-آ مصاحبه‌سی:

- ایرانلا اسرائیل آراسیندا یاشانان سون هجوملاردان سونرا حادثه‌لرین انکشافینی نئجه پروگنوزلاشدیریرسینیز؟

- حقیقتا ده مناسبتلر کریتیک نقطه‌ده‌دیر، لاکن آمریکا اسرائیلین هر هانسی حربی قصاصینی دستکلمیجیینی بیلدیردی. بو، ایرانا بیر سیگنال گؤندریر کی، آمریکا یاخین شرقده پروسسلرین داها دا گرگینلشمه‌سینده ماراقلی دئییل. آنجاق حادثه‌لرین نئجه انکشاف ائدجیینی هله گؤره بیلمیریک.

- ایران و آمریکا آراسیندا محاربه احتمالی وارمی؟

- بوگونکو غیر-ثابت و طلاطملو دنیادا هر شی ممکوندور، لاکن دوشونمورم کی، آمریکا و ایران آراسیندا محاربه یاخین گله‌جکده باش وئره بیلر.

- ایراندا یاشایان آذربایجانلیلارین اؤز مقدراتینی تعیین‌ائتمه حقوقونا آمریکانین مناسبتی نئجه‌دیر؟ دموکراتیک و انسان حاقلاری پوزولان بیر ملته - یعنی آذربایجانلیلارا آمریکا دستک گؤسترمه‌لیدیرمی و بو دستک نئجه اولا بیلر؟

- تأسف کی، آمریکالیلارین اکثریتی ایرانین شمالیندا یاشایان ۲۵ میلیون (و یا داها چوخ) آذربایجانلی حاقیندا چوخ شی بیلمیر. اونا گؤره ده بو مسئله مدیادا و سیاسی دایره‌لرده، خصوصاً ده سئچکی ایلینده چوخ مذاکره اولونمور. عمومیتله، آمریکا-دا ایرانداکی آذربایجان‌لیلارین مدنی و سیاسی ایستکلری دستکله‌مه‌لیدیر، لاکن ایلک نوبه‌ده آمریکا اجتماعیتینی بو موضوع‌دا معارفله‌ندیرمک لازم‌دیر.

- ایران آمریکا طرفیندن بیر چوخ ساحه‌لرده سانکسییالارا معروض قالیب. بو سانکسییالارا عمل ائتمه‌یه‌ن اؤلکه‌لره ده مناسبتی سرتدیر. لاکن ارمنیستانلا ایرانین درین و هرطرفلی مناسبتینین اولماسیندا سانکی استثنالار وار. ارمنی لوبیسی بو مسئله‌ده آکتیو رول اویناییرمی؟

- ایران و ارمنیستان بیر چوخ ساحه‌لرده امکداشلیق ائدیر، او جمله‌دن بانکلار، تهلوکه‌سیزلیک، سانکسییایا معروض قالان محصوللارین کئچیدی و سایر. امینه‌م کی، آمریکا حکومتی بو حساباتلاردان خبرداردیر. آمریکا رئاکسییاسینین نیه ضعیف اولدوغونو سؤیله‌مک چتیندیر. بلی، آمریکا-داکی ارمنی لوبیسی رول اویناییر، لاکن بو، حل‌ائدیجی دئییل. یقین کی، آمریکا حکومتی اوچون ارمنیستانلا ایران آراسینداکی بو مناسبتلر کفایت قدر اهمیت کسب ائتمیر.

- عینی زماندا تهران نظارتینده اولان مدیا واسطه‌سیله اسرائیلله گرگینلیک فونوندا آذربایجانی دا تهدید ائدیر. بو تهدیده ده آمریکا-دان رئاکسییا آرزولانان سویه‌ده دئییل.

- آذربایجانلا ایران آراسیندا گرگینلییه اشاره ائد‌ن معلوماتلار وار. بو مناسبتلر هئچ واخت مکمل اولماییب و ایران تئز-تئز آذربایجانی اسرائیلله یاخشی مناسبتلرینه گؤره تنقید ائدیر. طبیعی کی، بئله بیر تنقید آذربایجانین خارجی سیاست مسئله‌لرینه مداخله‌دیر. لاکن آذربایجانین اسرائیلله علاقه‌لری تکجه ایراندان دئییل، دیگر اؤلکه‌لردن گلن تنقیدلره رغما گوجلو، ثمره‌لی و محصولدار اولاراق قالیر. بو بیزی سئویندیریر.

- ایران ارمنیستانلا آذربایجان آراسیندا مذاکره اولونان زنگزور دهلیزینه قارشی منتیقسیز شکلده چیخیر و بو یولون آچیلماسینا مانعه تؤره‌دیر. سیزجه نیه؟

- ایرانین زنگزور دهلیزینین آچیلماسینا قارشی اولدوغو بوتون سببلری (آچیق و یا گیزلی) درک ائتمک چتیندیر. بعضی اکسپرتلر حساب ائدیرلر کی، ان مهم سببلردن بیری اقتصادیدیر؛ زنگزور دهلیزی آچیق اولارسا، ایران اؤز اراضی‌سیندن ماللارین ترانزیتیندن الده ائتدیی گلیری ایتیرجک. دیگر سبب ایسه ایرانین داشینان ماللار اوزرینده معین نظارتی و آذربایجانا تأثیر ریچاقلارینی ایتیرمکدن قورخماسی اولا بیلر. هر حال‌دا، دهلیز آذربایجان و ارمنیستان آراسیندا صلح دانیشیقلاری مسئله‌سیدیر و بیز امید ائدیریک کی، او، آذربایجان و ارمنیستان آراسیندا هرطرفلی صلحون بیر حصه‌سی کیمی نهایت آچیلاجاق.