بو گون آذربایجانین ملی بایرامی - مستقللیک گونو قید اولونور.

Axar.az خبر وئریر کی، ۲۸ مای ۱۹۱۸-جی ایل تاریخین‌ده مسلمان شرقینده ایلک دنیوی دموکراتیک دولت اولان آذربایجان خالق جمهوریتینین یارانماسیندان ۱۰۶ ایل اؤتور.

۱۹۱۷-جی ایلده روسیادا باش وئرمیش فورال انقلابی نتیجه‌سینده چار ایمپرییاسی دئوریلیب. اؤلکه‌ده چاریزمین مظلوم وضعیته سالدیغی خالقلارین ملی حرکاتی باشلانیب. ۱۹۱۸-جی ایل مایین ۲۸-ده آذربایجان خالق جمهوریتی (۱۹۱۸-۱۹۲۰) – مسلمان شرقینده ایلک دنیوی دموکراتیک دولت یارادیلیب. بو رسپوبلیکا آذربایجان‌لیلارین تاریخی یادداشیندا آذربایجان دولتچیلیینین ایلک تجربه‌سی کیمی ایز قویوب.

محمد امین رسول زاده طرفیندن اساسی قویولان آذربایجان خالق جمهوریتی تورک و اسلام دنیاسیندا ایلک پارلامنتلی جمهوریت و ایلک دموکراتیک، حقوقی و دنیوی دولت نمونه‌سی ایدی.

آذربایجان موقتی حکومتینین ایلک باشچی‌سی ایسه فتحعلی خان خویسکی ایدی. ۱۰ گون ملی شورا تفلیسده ایشلدیکدن سونرا گنجه‌یه کؤچورولوب. یالنیز ۱۹۱۸-جی ایلین سنتیابریندا تورکیه اردوسونون رهبرلیی ایله – باکی داشناک-روس قوه‌لردن تمیزلندیکدن سونرا ملی حکومت گنجه‌دن باکییا کؤچوب.

مستقل آذربایجان جمهوریتی قیسا عمرونده بؤیوک نایلیتلر و غالبیتلر الده ائدیب. ایلک دفعه قادینلارا سئچیم حقوقو تانییان و قادین–کیشی برابرلیینی تامین ائد‌ن جمهوریت او جمله‌دن ملی اردو، ملی پول، دموکراتلاشما، ملی بانک، آزاد سئچکیلر، بین‌الخالق علاقه‌لر و بین‌الخالق اجتماعیت طرفیندن آذربایجان استقلالینین رسمیته تانینماسی، آذربایجانین بوتؤولویونو تامین ائتمک، اقتصادی اصلاحات و سایر مستقل آذربایجان جمهوریتی تامین ائدیب.

آذربایجان دموکراتیک جمهوریتینی رسمی صورتده تانییان ایلک دولت عثمانلی دولتی اولوب (۴ ایون ۱۹۱۸-جی ایلده).

۱۹۱۸-جی ایل ۹ نویابر تاریخینده م.ا.رسولزادنین تکلیفی اساسیندا آذربایجان دموکراتیک جمهوریتینین اوچ رنگلی بایراغی قبول ائدیلیب. او زمانا قدر آذربایجان دموکراتیک جمهوریتینین بایراغی قیرمیزی رنگدیدی.

آذربایجان دموکراتیک جمهوریتی گرگین و مرکب اجتماعی-سیاسی شرایط‌ده جمعی ۲۳ آی فعالیت گؤستره بیلیب. تأسفلر اولسون کی، مستقل آذربایجان جمهوریتی ایکی یاشینا چاتمادان بولشئویکلرین هجومونا معروض قالیب موقتی اولاراق دئوریلدی. سووئتلر بیرلیی آذربایجانی مجبوری صورتده اؤز ترکیبینه داخل ائدیب. بولشئویکلر طرفیندن دئوریلمه‌سینه باخمایاراق، استقلال ایدئیاسی یئنیلمییب و ۱۹۹۱-جی ایلده سووئت ایمپرییاسینین داغیلماسی ایله آذربایجان یئنی‌دن اؤز مستقللیینی اعلان ائدیب.