بو گون شمسی تقویمی ایله ۱۴۰۳-جو ایلین مهر آیینین ۱-ی دیر و آنادیلیمیزه قارشی قویولان یاساقلار هله‌ده داوان ائدیر.

بو گون بو حقیقتی غرب‌ اینسانینا دئمه‌ک ایسته‌سه‌ک بلکه‌ده بیزه گوله‌رک، " ۲۱-جی عصرده یاشاییریق و سن هله‌ده آنادیلینده اوخوماق دردینده‌سن؟!" تعجوب و بلکه‌ده استهزا ایله جواب وئرجک. لاکین بو هم گولونج، هم ده آجی اولسادا، بیزیم دونیامیزین رئاللیغیدیر. بیز ۲۱-جی اصرده اوزگه دیلده اوخویوب اویرنمک مجبوریتینده‌ییک.

بو گون ایلک دفعه مکتبه آیاق باسان اوشاق آنلامیر کی نیه اوز آنادیلینده یوخ، تام اوزگه بیر دیلده اوخویوب اویرنه‌جک. بو گونه کیمی حیاتی، دونیانی اوز دیلینده کشف ائدیردیسه، بو گوندن سونرا غریبه دیلین ایچینده غرق اولاجاغینی آنلامیر... لاکین مهر آیینین ۱-ی اونون حیاتینین سونونا کیمی داشییاجاغی درین یارایا چئوریلیر. نه اولورسا اولسون، دونیانین هاراسینا گئدیرسه گئتسین، بو یارانین ایزینی اوزو ایله داشییاجاق.

بو یارا یا اونو اوزوندن اوزاقلاشدیراجاق، یا دا اوزونو یئنی‌دن تانیماغا سوق ائدجک. اما تاسف کی، بیر چوخ حالدا بیزی اوزوموزدن اوزاقلاشدیریر. مسئله ساده‌جه الیفبا‌دان عبارت دئییل؛ بیزی اوز مدنیتیمیزدن، تاریخیمیزدن اوزاقلاشدیرماقدیر. اوز آنادیلینه یاد بیر اینسان، اوز کئچمیشینه ده یاددیر و کئچمیشی حاقدا فیکیر صاحبی اولمایان بیرینین گله‌جه‌کده یئری اولابیلمز.

شاعر بختیار وهاب زاده-نین ده دئدییی کیمی، "منیم آنا دیلیم، منیم کیملییم، پاسپورتوم، اوزومه حاکیملییم".