ایرانین ان واجب رگیونال متفقلریندن اولان بشار اسد رژیمینین دئوریلمه‌سی یاخین شرقده باش وئرن پروسسلرده دؤنوش نقطه‌سی اولماقلا یاناشی، ایران اوچون آغریلی نتیجه‌لره سبب اولاجاق.

بو، تهران اوچون بؤیوک گئوسییاسی و استراتژی اوغورسوزلوق اولماقلا یاناشی هم ده ایرانین داخلی و بین‌الخالق سیاستلرینده دییشیکلیکلر اوچون کاتالیزاتور رولو اوینایاجاق.

بئله‌کی، بشار اسدین دئوریلمه‌سی تهرانین رگیونال تأثیرینه، حاکمیتین لگیتیملیینه، غربله باغلی سیاستلرینه و ایران‌دا یاشایان خالقلار اوچون دییشیکلیک ایستکلرینین گوجله‌نمه‌سینه اهمیتلی تأثیر گؤسترجک.

سوریانین ایرانین «مقاومت اوخو» آدلاندیردیغی جبهه‌نین حیاتی حالقاسی، تهران رژیمینین یاخین شرقده تأثیرینی گئنیشله‌ندیرمک و اسرائیلله قارشیدورما اوچون اساس واسطه‌لریندن بیری اولدوغونو نظره آلساق، بشارین سقوطونو هم‌ده ایرانین فورمالاشدیردیغی جبهه‌نین سقوطو کیمی دیرله‌ندیرمک اولار.

اونا گؤره کی، بونونلادا ایرانین دیگر متفقی حزب‌الله و باشقا پروکسی قوه‌لره سلاح اؤتورولمه‌سی و لوگیستیک دستک یولو کسیلمیش اولور.

عینی حال‌دا سوریادا باش وئرنلر ایرانین لیوان و دیگر حساس بؤلگه‌لرده تأثیر امکانلارینی خیلی آزالداجاق. سوریانین دستیی اولمادان حزب‌الله و تهرانا باغلی باشقا گروپلار رسورسلارین تامین ائدیلمه‌سینده جدی پروبلملرله اوزلشه‌جک و بو اونلارین عملیات گوجونون آزالماسینا، ایرانین بؤلگه‌ده‌کی موقعیینین جدی شکلده ضعیفله‌مه‌سی ایله نتیجه‌لنه‌جک.

بورادا ان واجب مسئله‌لردن بیری ده، بشار اسدین دئوریلمه‌سینین ایران‌دا یاشایان خالقالارین رپرسیونر سیستملرین ابدی اولماماسی، اونلارین سقوطونون ممکونلویو ایله باغلی وئردیی مساژ و یاراتدیغی امیددیر.

بو امید و اینام ایران‌دا اعتراض حرکاتلارینین فورمالاشماسینا و گوجله‌نمه‌سینه تکان وئرجک، ۲۰۲۲-جی ایلین اعتراضلارینین یاتیریلماسیندان سونرا یارانان مایوسلوغون آرادان قالخماسینا، اساسلی دییشیکلیکلرین پرسپکتیولری باره‌ده نیکبینلیین یارانماسینا سبب اولاجاق.

ایران‌دا یاشایان خالقلاردا دییشیکلیین ممکونلویو باره‌ده امیدلرین آرتماسی و نیکبینلیین یارانماسی ایله یاناشی، غربین ده بو استقامتده‌کی سیاستلرینین دییشمه‌سی، تهران حاکمیتی ایله "یولا گئتمک" عوضینه اپوزیسیونا دستیین گوجلندیریلمه‌سی، یئنی استراتگییانین فورمالاشدیریلماسی ممکون اولاجاق.

ان اهمیتلی مسئله‌لردن بیری ایسه سوریادا مغلوبیتدن سونرا، ایران حکومتینین مختلف فراکسییالاری آراسینداکی موجود اوچورومو درینلشه‌جک، حاکم سیستمین عمومی سیاستلرینی دییشدیرمک اوچون تضییقلری و جهدلری آرتاجاق.

رپرسیو رژیملرین دییشمه‌سینین اکثر حاللاردا اونون سقوطو ایله نتیجه‌لندیینی نظره آلساق، ایران‌داکی حاکم سیستم‌ده مجبوری دییشیکلیین، اونون دئوریلمه‌سی پروسسینی سرعتلندیرجیینه سبب اولاجاغی قاچیلمازدیر.

رگیونال سوییه‌ده ایسه دمشق دیکتاتورونون دئوریلمه‌سی ایران‌دا رژیم دییشیکلیی اوچون گلوبال کونسنسوسا گتیریب چیخاراجاق. بئله اولدوغو تقدیرده ایسه غرب اؤلکه‌لری و رگیونال رقیبلرین بو فرصتدن استفاده ائد‌رک تهرانا داها چوخ تضییق گؤسترجکلری مطلقدیر.

و ان سون‌دا، اسدین چؤکوشو ایرانا سیاسی و باشقا ساحه‌لرده‌کی آجی تأثیرلری ایله یاناشی، هم‌ده اونون بؤلگه‌ده‌کی ایدئولوژی تأثیرینین آغیر مغلوبیته اوغراماسی دئمکدیر.

بشار اسدی "غرب قارشی‌سیندا مقاومت سیموولو"، سوریانی ایسه "غربین و صهیونیزمین هجومو قارشی‌سیندا مقاومت قالاسی" آدلاندیران علی خامنه‌ای ان گوج‌لو ایدئولوژی قالاسینی ایتیردی. بو ایسه او بیری ضعیف قالالارین زنجیرواری شکلده داغیلاجاغینین باشلانغیجیدیر.