ایران حکومتی مختلف بهانه و اتهاملارلا حبس ائتدیی آوروپالی محکوملاردان نووه دانیشیقلارین‌دا تضییق واسطه‌سی کیمی استفاده ائدیر.

بو، سون ایکی گونده ایران‌دا حبس‌ده اولان ایسوچ و فرانسا وطنداشلارینین یاییلان سس یازیلاریندان دا حس اولونور.

تهرانین آلمانیا، بریتانیا و فرانسا ایله نووه دانیشیقلارینین یئنی مرحله‌سینین باشلانماسی ایله عینی واختدا، آوروپالی محبوسلار اؤلکه‌لرینین حکومتلرینه مراجعت ائدیب، حبس‌دن بوراخیلمالاری اوچون تدبیرلر گؤرولمه‌سینی ایسته‌ییبلر.

ایران حبسخانالارین‌دا ساخلانیلان ایسوچ-ایران ایکی‌لی وطنداشی احمدرضا جالالی و فرانسا وطنداشی اولیویه گراندونون رسمی استکهلم و پاریسه عنوانلانان سس یازیلارینین مانعه‌سیز یاییلماسی، اونلارین حبسخانادا آغیر شرایط‌ده اولمالاری باره‌ده مئساژلاری، بونون یاییلماسین‌دا تهران حکومتینین ماراقلی اولدوغونا دلالت ائدیر.

بیلدییمیز کیمی ، ایران حبسخانالاریندا آغیر اتهاملارلا ساخلانیلان محکوملار، خصوصاً جاسوسلوق‌دا اتهام اولونان خاریجی وطنداشلار تام تجرید اولونموش وضعیت‌ده ساخلانیلیرلار.

بونا باخمایاراق، جاسوسلوغا گؤره حبس ائدیلن ایکی آوروپالنین سس یازیلارینین حبسخانادان اؤلکه‌لرینه گؤندریلمه‌سی، مئدیادا گئنیش یاییلماسی، بو مسئله‌ده ایران حکومتینین ماراقلی اولدوغونو گؤستریر.

خصوصاً هم احمدرضا جلالی و هم ده اولیویه گراندو سس یازیلاریندا ایسوئچ و فرانسا حکومتلرینی تنقید ائدیب، اونلارین سربست بوراخیلماسی اوچون یئترلی سعی گؤسترمدیینی بیلدیریبلر.

بو، هر ایکی محبوسون تهلوکه‌سیزلیک مأمورلارینین تضییقی و تکلیفی اساسین‌دا بئله بیر مراجعت اونوانلادیقلارینا دایر احتماللاری داهادا گوجلندیریر.

قید ائدک کی، بوندان اول ایرانین خاریجی، خصوصاً آوروپا وطنداشلارینی غربله دانیشیقلاردا امتیاز آلماق مقصدیله گیروو گؤتوردویو دفعه‌لرله وورولانیب.

ایکی آوروپالینین سس یازیلارینین یاییلماسی ایسه بونو بیر داها تصدیقلییر و تهرانین غربله، خصوصاً آوروپا اؤلکه‌لری ایله دانیشیقلاردا اؤز ایستکلرینی دیکته ائتمک نیتینده اولدوغونو و یا قارشی طرفین شرطلرینین ممکن قدر یوموشالدیلماسینا چالیشدیغینی گؤستریر.