تهران‌دا ۱۰-۱۷ فورال آراسی کئچیریله‌ن تبریز مدنیت هفته‌سینی بیر چوخ سببلره گؤره اصلین‌ده تبریز آدینا کئچریلن «ایران مدنیت هفته‌سی» آدلاندیرماق اولار.

بوندان اول تدبیر تشکیلات‌چیلاری مراسیمین کئچیریلمه‌سینده مقصدین تبریز و شرقی آذربایجانین توریزم، اقتصادیات و باشقا ساحه‌لرده‌کی پوتنسیالینی تانیتدیرماق‌دان عبارت اولدوغونو بیلدیرسه‌لر ده، مراسیمین کئچیریلدیی گونلرده بو ساحه‌لره او قدر ده دقت یئتیریلمه‌ییب.

خصوصاً آذربایجان مدنیتی ایله باغلی وعد وئریله‌ن تدبیرلرین چوخو باش توتماییب، آذربایجان مدنیتینی ساده‌جه بیر نئچه آشیغین، بالابان‌چی و قوشاناغاراچینین تمثیل ائتمه‌سینه اجازه وئریلیب.

قورولان رسم سرگیلرینده ایران-فارس رسام‌لیق مکتبی تبلیغ اولونوب، تبریزین ایرانین آیریلماز پارچاسی اولدوغو تلقین ائدیلیب و فارس مدنیتینین عنصرلریندن بیری کیمی قلمه وئریلیب.

بورادا خصوصیله آذربایجان دیلی ایله باغلی دیقته‌لایق هئچ بیر تدبیر کئچیریلمه‌ییب، چیخیشلار اولماییب، شهریارین «حیدربابایا سلام» پویماسین‌دان بیر-ایکی بند اوخونوب، آذربایجان دیلی و مدنیتی بیر-ایکی بایاتی سویه‌سین‌ده تقدیم ائدیلیب.

آذربایجان‌لی موسیقی‌چیلر، صنعت آداملاری، موغه‌ننیلر تدبیره بوراخیلماییب، فارس موسیقی و مدنیتینین زنگینلشدیریلمه‌سینده رولو اولان، آذربایجان مدنیتینه آیدیتی اولمایان شخصلر تبریزین و آذربایجانین مدنیت نماینده‌لری کیمی تبلیغ اولونوب.

بو مراسم تشکیلاتچیلار و بیر سیرا رسمی قوروملارین دا بیلدیردیی کیمی، آذربایجان و تبریزی ایران، داها دوغروسو، فارس مدنیتینین بیر پارچاسی کیمی قلمه وئرمک سیاستینه خدمت ائدیب.

خصوصاً تبریز مدنیت هفته‌سینین باغلانیش مراسیمینده فارسجا چیخیش ائد‌ن اؤلکه پرزیدنتی مسعود پزشکیانین هر زمان اولدوغو کیمی، آذربایجان‌لیلارین باشینا سیغال چکمک اوچون شهریارین «حیدربابایا سلام» پویماسین‌دان ایکی بند شعیر اوخوماسینا دا ایراد بیلدیریلیب و او، شعیرین داوامینی اوخوماغا جسارت ائتمه‌ییب.

بونونلا یاناشی ایران اقتصادیاتین‌دا اهمیت‌لی یئری اولان شرقی آذربایجان اقتصادیاتی چوخ جیلیز فورمادا، لیقوان پندیری، سارابین نهره یاغی، سودلو دوندورما، هانسی‌سا کندین قووورماسی و بو کیمی اهمیت‌سیز استهصالات سوییه‌سین‌ده تقدیم ائدیلیب.

بوتون بونلار ایسه هم آذربایجا ایالتلریندن، هم ده ایرانین باشقا بؤلگه‌لریندن آذربایجان و تبریز آدینا گؤره تهرانا اوز توتان مینلرله انسانین چوخونون خیال قیریق‌لیغینا سبب اولوب.

یئرلی سوسیال مئدیا شبکه‌سین‌ده‌کی پایلاشیملار و یازیلان رای‌لردن ده اکثریتین تدبیرین بو فورمادا کئچیریلمه‌سین‌دن نارازی قالدیغی، تبریز آدی ایله آذربایجان‌لیلارین بیر داها آلدادیلدیقلارین‌دان ناراحات‌لیقلاری مشاهده اولونور.