بو گون تبریزین یادگار امام (سهند) استادیونون‌دا کئچیریله‌ن چمپیونلوق بایرامین‌دا "تراکتور" طرفدارلاری «یئل یاتار، طوفان یاتار، یاتماز تراکتور بایراقی» شعاری ایله تبریز تمثیلچی‌سینی آلقیشلاماقلا گینس رکوردونو قیریبلار.

Axar.az خبر وئریر کی، بو باره‌ده تبریزین "آذرانجمن" نشری گینسین رکوردلار کتابینین چمپیونات شنلیینده اشتراک ائد‌ن ایران نماینده‌سینه استنادن معلومات یاییب.

بیلدیریلیب کی، آزارکئشلرین آلقیشلارینا گؤره دنیا رکوردونون ۱۲ دقیقه اولدوغونو نظره آلان "تراکتور" آزارکئشلری بو رکوردو ۱۵ دقیقه‌لیک آلقیشلا قیریبلار.

تبریز تمثیلچی‌سینین طرفدارلاری ۱۵ دقیقه عرضینده دایانمادان "یئل یاتار طوفان یاتار یاتماز تیراختور بایراقی" ، "گول سولار، سونبول سولار، اؤلمز بیزیم غیرتلی تیم- بیز تراکتور عاشیقی تورکلر کیمی غیرتلی‌دی" شعارلارینی سسلندیرر.

قید ائدک کی، یئرلی مدیانین معلوماتینا گؤره، سهند استادیونو و اطراف تپه‌لره آذربایجان ایالتلری و ایرانین مختلف بؤلگه‌لریندن ۲۰۰ مین "تراکتور" طرفداری توپلاشیب.

ایران تلویزیاسی چمپیونلوق شنلیینده آذربایجان خالق ماهنیلاری، آشیق موسیقی پارچالاری و آذربایجان دیلینده سسله‌ندیریله‌ن شعارلاری سنزورا ائدیب.

دولت تلویزیاسی "تراکتور" کلوبونون ییه‌سی محمدرضا زنوزینین فارس دیلینده قیسا چیخیشینی یایسا دا، اونون آنادیلینده ائتدیی چیخیشی زمانی سسی کسیب.