۲۷ یانوار ۲۰۲۳-جو ایلده آذربایجان رسپوبلیکاسینین تهران‌داکی سفیرلیینه سلاحلی هجوم ائد‌ن یاسین حسین‌زاده ۱۹۷۱-جی ایلده مرندین یکان اولیا کندینده آنادان اولوب.

یاسین (سفر) حسین‌زاده ۱۹۸۷-جی ایلده ایران انقلاب کشیکچیلری کورپوسونون سیرالارینا قاتیلیب و ایران-عراق محاربه‌سی زمانی قیسا مدت عرضین‌ده ۳۱-جی عاشورا دیویزیاسین‌دا دؤیوشده اشتراک ائدیب.

محاربه باشا چاتدیقدان سونرا تبریزده انقلاب کشیکچیلری کورپوسوندا آغیر ماشین سوروجوسو کیمی ایشله‌مه‌یه داوام ائدیب. او، ۱۹۹۹-جو ایلده کؤنوللو اولاراق سپاه-دان تقاعده چیخیب، میوه و بال ساتیشی ایله مشغول اولوب.

همین ایللردن او تهرانا کؤچوب و ایلین بیر نئچه آیینی تهران‌دا، قالان واختلاری ایسه مرند محالین‌دا آتاسینین کندی یکان اولیادا، ائلجه ده اؤردکلی بؤلگه‌سینده یاشاییب.

یاسین حسین‌زاده، ۱۹۹۹-۲۰۰۶-جی ایللرده مرندده‌کی یالدور مسجیدینین سپاه-آ باغلی "بسیج" (یاریم حربی کؤنوللولر اوردوسو) قوه‌لرینین باشچی‌سی اولوب، آذربایجان رسپوبلیکاسینین سفیرلیینه هجوم ائد‌ن واختا قدر ده آدی چکیلن "بسیج" قرارگاهی ایله علاقه‌سینی قورویوب ساخلاییب.

یاسین حسین‌زاده‌نین ۲۰۲۲-جی ایلده ایران‌دا باشلایان اعتراض آکسیالارین‌دا "بسیج" و انقلاب کشیک‌چیلری کورپوسو (سپاه) ایله بیرلیکده تبریز، ماراغا و بوکان شهرلرینده اعتراض نمایشلرینین یاتیریلماسیندا اشتراک ائتدیی باره‌ده معلوماتلار یاییلیب.

۲۷ یانوار ۲۰۲۳-جو ایل سحر ساعتلاریندا یاسین حسین‌زاده قاتلانان کالاشنیکوو آک-۴۷ سلاحی ایله سفیرلیه هجوم ائدیب. هجومدان سونرا او ایران پلیسینه تحویل وئریلمه‌دن اؤنجه آذربایجان سفیرلیینین محافظه‌چیلرینین الین‌ده اولان سلاحین فوتوسو یاییلیب.

آذربایجان سفیرلیینین محافظه خدمتینین امکداشینین دئدیینه گؤره، سلاحین سرییا نمره‌سی ساختالاشدیریلیب و اونون قونداغینین سریا نمره‌سی ن---۱۲۰۶۷-دیر کی، بو دا حاضردا داخلی منبع‌لر واسطه‌سیله آراشدیریلیر.

بو سلاح ایران اسلام رسپوبلیکاسینین سلاحلی قوه‌لرینه عاید دئییل، لاکین بو سرییا آشکار ائدیلدیکدن سونرا ۱۵ ایون ۲۰۰۸-جی ایلده لورستان پلیس دایره‌سینین اجتماعی تهلوکه‌سیزلیک کوماندانلیغی طرفیندن قبول ائدیلیب و ان آزی ۲۰۲۱-جی ایلین مارتینا قدر زنجان ایالتینده پلیس قوه‌لرینین آشکار ائتدیی سلاح و سورساتلار آنباریندا ساخلانیلیب.

سلاح یاسین حسین‌زاده‌یه نئجه چاتیب؟

بو سوالا ایرانین علاقه‌دار دولت قوروملاری جواب وئرمه‌لی اولسالار دا، بو گونه کیمی بونونلا باغلی آچیقلاما وئریلمه‌ییب.

بو ایسه آذربایجان رسپوبلیکاسینین سفیرلیینه هجومون حکومته باغلی هانسی‌سا قوروم طرفیندن پلانلاشدیریلدیغی احتمالینی آرتیریر.

آذربایجان رسپوبلیکاسینین پرزیدنتی الهام علیئو ده، بوندان اول مسئله ایله باغلی وئردیی مصاحبه‌لرده هجوم‌چو و هجومون آرخاسیندا دوران شخصلرین جزالاندیریلماسینی طلب ائدیب.

ایران مئدیاسینین معلوماتینا گؤره، هجوم‌چو بو گون جزالاندیریلیب، هجومون آرخاسین‌دا دوران، اونو پلانلاش‌دیران شخصلرین اعلان ائدیلمه‌سی و جزالان‌دیری‌سی مسئله‌سی ایسه قئیری-معین اولاراق قالیر.