۱۶:۴۴

خانکندیده ایولون ۴-ده آذربایجان پرزیدنتی ایلهام علیئوله ایران پرزیدنتی مسعود پزشکیانین گؤروشو اولوب.

Axar.az خبر وئریر کی، دولت باشچیلاری صحبت زمانی آذربایجانلا ایرانین دوست، قونشو، قارداش اؤلکه‌لر اولدوقلارینی وورغولایاراق، اؤلکه‌لریمیز آراسین‌دا مدنی، اعتقاد، عنعنه‌لر، ائتنیک باخیم‌دان قوهوملوق و قارداشلیق علاقه‌لرینین موجودلوغونو قید ائتدیلر.

آذربایجان دولت باشچی‌سی دعوتی قبول ائدیب اقتصادی امکداشلیق تشکیلاتینین ۱۷-جی زیروه گؤروشونده اشتراکینا گؤره ایران اسلام رسپوبلیکاسینین پرزیدنتی مسعود پزشکیانا تشکورونو بیلدیردی، اونون بو سفرینین و کئچیریله‌ن گؤروشون آذربایجان-ایران ایکی‌طرفلی علاقه‌لرینین، همچنین اقتصادی امکداشلیق تشکیلاتی چرچیوه‌سینده امکداشلیق مسئله‌لرینین مذاکره‌سی باخیمیندان اهمیتلی اولدوغونو دئدی.

مسعود پزشکیانین بو ایلین آپرلینده آذربایجانا رسمی سفرینین ایکی‌طرفلی علاقه‌لرده یئنی صفحه آچدیغینی وورغولایان پرزیدنت ایلهام علیئو همین سفر زمانی مذاکره اولونان موضوع‌لارین حیاتا کئچیریلمه‌سی اوچون حکومتلرآراسی کومیسیانین رهبرلری و عایدیتی دولت قوروملاری طرفیندن آردیجیل صورتده ایشلرین آپاریلدیغینی قید ائتدی.

دولت باشچی‌سی اسرائیلله ایران آراسین‌دا قارشی‌دورمانین باش وئرمه‌سیندن درحال سونرا ایرانا قارشی اولان بو حرکتلرین آذربایجان رسپوبلیکاسی خارجی ایشلر ناظیرلیی طرفین‌دن قینانیلدیغینی بیلدیردی. پرزیدنت ایلهام علیئو بو قارشی‌دورمادا ایرانین رسمی و ملکی شخصلرینین هلاک اولماسی ایله علاقه‌دار بیر داها آذربایجان طرفینین ایران خالقینا باشساغلیغینی چاتدیردی، آذربایجان دولتینین و خالقینین ایران دولتی و خالقی ایله همرایلیینی، دستیینی ایفاده ائتدی. دولتیمیزین باشچی‌سی آذربایجانین همیشه حاق-عدالتین طرفداری اولدوغونو وورغولادی. پرزیدنت ایلهام علیئو قید ائتدی کی، مسلمان اؤلکه‌لری، او جمله‌دن قونشو دولتلر ایله علاقه‌لرین انکشاف ائتدیریلمه‌سی آذربایجانین خارجی سیاستینده پریوریتت استقامتلردن بیریدیر.

اقتصادی امکداشلیق تشکیلاتینین زیروه گؤروشونون آذربایجان‌دا، خانکندی شهرینده تشکیل ائدیلمه‌سینی و گلن ایل اسلام امکداشلیق تشکیلاتینین زیروه گؤروشونون آذربایجان‌دا کئچیریلجیینی وورغولایان دولت باشچی‌سی بوتون بونلاری اسلام دنیاسی طرفیندن اؤلکه‌یه اولان اعتمادین و حرمتین نوبتی نمونه‌سی کیمی قیمتلندیردی.

ایران اسلام رسپوبلیکاسینین پرزیدنتی ده اقتصادی امکداشلیق تشکیلاتینین زیروه گؤروشونون یوکسک سوییه‌ده تشکیلینه گؤره تبریکلرینی چاتدیردی.

آذربایجانا رسمی سفرینی و کئچیریلمیش گؤروشلری ممنونلوقلا خاطیرلایان مسعود پزشکیان سفرین نتیجه‌سی اولاراق آذربایجان-ایران علاقه‌لرینده یئنی صحفحه‌نین آچیلدیغینی وورغولادی، بو خصوصدا، آرتیق باکی ایله تهران، باکی ایله تبریز آراسین‌دا طیاره اوچوشلارینین آرتیریلماسینی، آغبند-کلاله آوتوموبیل یولو کؤرپوسونون تیکینتی‌سی استقامتینده ایشلرین آپاریلماسینی قید ائتدی و دیگر ساحه‌لرده امکداشلیق مسئله‌لرینه توخوندو.

ایران پرزیدنتی اسرائیلله باش وئرمیش قارشی‌دورما زمانی آذربایجانین گؤستردیی دسته‌یه و همرای‌لییه گؤره منتدارلیغینی بیلدیردی.

گؤروشده قارشی‌لیقلی ماراق دوغوران مسئله‌لره، همچنین اکو چرچیوه‌سینده علاقه‌لرین گئنیشلندیریلمه‌سینه دایر اطرافلی فکر مبادله‌سی آپاریلدی.