گونئی آذربایجانین «تراختور» فوتبول کلوبونون رسمی شیکایتی و کومان‌دا طرفدارلارینین کسکین اعتراضین‌دان سونرا نهایت کی، تهرانین «پرسپولیس» کومان‌داسینین قاپی‌چی‌سی فوتبول فدراسییاسینین اینضیباطی کمیته‌سینه چاغیریلیب.

آخار. آذ خبر وئریر کی، بو باره‌ده اینضیباطی کمیته، فوتبول فدراسییاسینین رسمی سایتین‌دا بیلدیریش یاییب.

بیلدیریلیب کی، علیرضا بیرانوند بعضی مسئله‌لره آیدین‌لیق گتیرمک اوچون شنبه گونو اینضیباطی کمیته‌یه مراجعت ائتمه‌لی‌دیر.

علیرضا بیرانوند ۱۹-جو سوپر لیگ یاریشلارینین ایکینجی هفته‌سین‌ده (آوگوستون ۳۰-او) کومان‌داسی ائو صاحبینه ۱:۰ حسابی ایله مغلوب اولدوق‌دان سونرا اوزونو «تراختور» طرفدارلارینا توتاراق اخلاق‌دان کنار و نالاییق بیر حرکته یول وئرمیش‌دیر. تبریزین سهند ایستادیونون‌دا باش وئره‌ن حادثه «تراختور» طرفدارلاری و آذربایجان کلوبونون کسکین اعتراضینا سبب اولدو.