اؤتن آخشام ایران پرمیر لیگاسینین ۱۴-جو هفته‌سینین اویونلاری چرچیوه‌سینده تبریزین "تراکتور" کلوبو ایله مازاندارانین "نساجی" کلوبونون قارشیلاشماسی اولوب.

Axar.az خبر وئریر کی بو باره‌ده ایدمان مئدیاسی معلومات یاییب.

مازندران ایالتینین قایمشهر شهرینین ایستادیونون‌دا گرگین کئچه‌ن قارشیلاشما ۱-۱ حسابی ایله باشا چاتیب.

بونونلادا "تراکتور" ۲۹ خاللا پرمیر لیگانین تورنیر جدولینده ایکینجی پیلله‌یه دوشوب، رقیب کوماندا ایسه ۱۴ خاللا ۱۲-جی پیلله‌ده قرارلاشیب.

اویون باشلایاندان "نساجی" آزارکشلری آذربایجان کومانداسی و آزارکئشلرینی تحقیر ائدیب، میدانچایا و "تراکتور"چولار اولان جرگه‌لره یاد جسیملر آتیبلار.

حاکملر بونا اعتیناسیز یاناشماسینا اعتراض ائد‌ن "تراکتور" کلوبونون باش مشق‌چی‌سی دراقان ایسکوچیچ و کومان‌دانین هجوم‌چوسو مهدی هاشم‌نژادا قرمیزی کارت وئریله‌رک سویونما بؤلمه‌سینه گؤندریلیبلر.

اویون باشا چاتدیقدان سونرا مازندران‌لیلار استادیوندان چیخان آذربایجان‌لی آزارکشلره هجوم ائدیب، قارشی‌دورما نتیجه‌سینده هر ایکی طرفدن اونلارلا شخص یارالانیب.

"تراکتور" کلوبو مسئله ایله باغلی فوتبول فدراسییاسینا شیکایت مکتوبو یازیب، کلوبون چمپیون اولماسینا مانع اولماق اوچون حاکملرین، فوتبولچولارین و فوتبول فدراسیاسینین بیرلشدیینی دئییب.

"تراکتور"ون کاپیتانی شجاع خلیل‌زاده مئدیایا وئردیی آچیقلامادا ایران کلوبلارینین "تراکتور"ا قارشی مناسبتیندن تعجب‌لندیینی بیلدیریب.

"گؤرونور "تراکتور" چمپیون اولماق اوچون بوتون ایرانلا مبارزه آپارمالی‌دیر"،- فوتبولچو دئییب.