بین الخالق والیوتا فوندونون (دنیا بانکی) پروقنوزلارینا گؤره، گلن ایل ۱۹۰ اؤلکه‌نین میللی گلیرینین عمومی حجمی ۲۰۱۷-جی ایل ایله موقاییسه‌ده ۵،۱ تریلیون دوللار آرتاراق ۸۳،۸ تریلیون دوللارا چاتاجاق.

آخار. آذ خبر وئریر کی، بو معلوماتی «بلومبرگ» آگنتلیگی یاییب. بین الخالق والیوتا فوندونون آچیقلاماسیندا بیلدیریلیر کی، بو ایل دونیا اوزره ۷۸ تریلیون ۷۴۰ میلیارد دوللار حجمینده اولان عمومی داخیلی محصولون (اودم) حجمی گلن ایل ۸۳ تریلیون ۸۰۱ میلیارد دوللارا چاتاجاق. محض بو سببدن دونیا اؤلکه‌لرینین میللی گلیرینین ۵ تریلیون ۶۱ میلیارد دوللار حجمینده آرتاجاغی گؤزلنیلیر.

فوندون احتیماللارینا گؤره، میللی گلیری ان چوخ آرتان اؤلکه چین اولاجاق. بوراداکی آرتیمین ۱ تریلیون ۱۸۱ میلیارد دوللار حجمین‌ده اولاجاغی گؤزلنیلیر.

میللی گلیرین ان چوخ آرتاجاغی دوشونولن ایکینجی اؤلکه ایسه آمریکادیر. فوندون آراشدیرماسینا گؤره، بوراداکی آرتیم ۸۳۷ میلیارد دوللار حجمین‌ده اولاجاق. دونیانین ان بؤیوک میللی گلیرینه صاحب اولان آمریکادا اودم بو ایل ۱۹ تریلیون ۳۶۲ میلیارد دوللاردیرسا، گلن ایل بونون ۲۰ تریلیون ۲۰۰ میلیارد دوللار سوییه‌سینه چاتاجاغی گؤزلنیلیر.

فوندون پروقنوزلاریندا بیلدیریلیر کی، عمومی داخیلی محصولدا ان چوخ آرتیم الده ائدجیی دوشونولن اؤلکه‌لر سیراسیندا ۲۸۲ میلیارد دوللار حجمینده آرتیم احتیمالی ایله آلمانییا اوچونجو یئرده‌دیر. سیاهیدا هیندیستان ۲۱۵، فرانسا ۱۹۰، یاپونییا ۱۷۸، ایتالییا ۱۲۷، کانادا ایسه ۱۲۳ میلیارد دوللارلیق آرتیم احتیمالی ایله یئر آلیب.

تورکییه‌ده بو ایلین سونونا قدر ۸۴۱ میلیارد دوللارا چاتاجاغی دوشونولن میللی گلیرین گلن ایل ۶۴،۵ میلیارد دوللار آرتاراق ۹۰۵ میلیارد دوللارا چاتاجاغی پروقنوزلاشدیریلیر.

فوندون ترتیب ائتدیی پروقنوزلارا گؤره قاداغا و سانکسییالارلا گونده‌مدن دوشمه‌ین ایران‌دا بو ایلین سونوندا ۴۲۷ میلیارد دوللار اولماسی گؤزله‌نیله‌ن میللی گلیرین گلن ایل ۳۹۸ میلیارد دوللارا قدر گئریلیجیی احتیمال اولونور. ایرانین، ۲۹ میلیارد دوللارلیق اقتصادی کیچیلمه ایله میللی گلیری ان چوخ آزالان اؤلکه اولاجاغی پروقنوزلاشدیریلیر.