ایرانین علم، تدقیقات و تخنولوگییا ناظیری حسین سیمایی صراف آذربایجاندا واحد مکتبلی گئییمینین تطبیقینه قارشی چیخیب و تحصیل حقوقوندان محروم اولدوقلارینی ادعا ائد‌ن قیزلارا «آزاد تحصیل محیطی» یارادا بیله‌جکلرینی اعلان ائدیب. «ایران اونیورسیتتلری آذربایجانلی قیزلاری قبول ائتمه‌یه حاضردیر» دئیه‌ن سیمایی صراف بیلدیریب کی، گئییم فورماسی تحصیله مانع اولمامالیدیر.

ایرانلی ناظیرین بو آچیقلاماسی آذربایجانین داخلی ایشلرینه آچیق شکلده مداخله ائتمک جهدیدیر. ایراندان آذربایجانا قارشی بو کیمی جهدلر ائدیلمه‌سی، خصوصیله دینی مسئله‌لرین سیاسی آلته چئوریلمه‌سی زمان-زمان اولدوغو اوچون سیمایی صرافین آچیقلاماسی او قدر ده تعجبلو دئییل، لاکن ایرونیکدیر.
بیرینجی‌سی، ایراندا ایللردیر ۴۰ میلیون آذربایجانلینین آنا دیلینده تحصیل آلماق حقوقو پوزولور. حتی یئرلی و ملی دیللرین مطبوعاتدا استفاده‌سی، همچنین مکتبلرده تدریس ائدیلمه‌سی ایران کونستیتوسییاسیندا تثبیت اولونسا دا، رئاللیقدا بو، هئچ واخت یئرینه یئتیریلمه‌ییب.
سیمایی صرافین ایستیی حقیقتن ده انسانلارین تحصیل آلماسیدیرسا، او زمان آذربایجانا دیل اوزاتماقدان اؤنجه ۴۰ میلیون آذربایجانلینین تحصیل حقوقونون تامین ائدیلمه‌سی ایله مشغول اولمالیدیر.

ایراندا تحصیل حقوقوندان محروم اولان آذربایجانلی خانیمین ناظیر صرافا مراجعتی بو اؤلکه‌نین تحصیل سیستمینده‌کی حاقسیزلیغی گؤز اؤنونه سریر. «بابای وزیر، آذربایجانلی قیزلار ایراندا هانسی دیلده تحصیل آلاجاق؟ یوز ایلدیر کی، ایرانین آذربایجانیندا بیز آنا دیلینده تحصیل آلماقدان محروموق. ایندی آذربایجانلی قیزلارا ایراندا آذربایجان دیلینده مدره‌سه و مکتب حاضیرلایاجاقسینیز؟ اگر بونو ائله بیلردینیزسه، بس، ایران‌داکی آذربایجانلیلارا نیه ایندییه قدر آنا دیلینده تحصیل آلماغا امکان وئرمه‌میسینیز. بیر وطنداش اولاراق، آنا دیلینده تحصیل آلماق حاقیمدیر»، - گونئی‌لی قیز بیلدیریب. بابای صراف، بویور، ایران وطنداشی اولان آذربایجانلی خانیما جواب وئر. وئره بیلمز، چونکی «آذربایجانلی قیزلارین ایراندا تحصیلینه شرایطین یارادیلماسی»ندا مقصد تحصیل حقوقونون تامین ائدیلمه‌سی یوخ، آذربایجاندا دیندارلارین اینانجیندا سیاسی آلت کیمی استفاده ائتمکدیر. ایکینجی‌سی، ایرانلی ناظیر آذربایجانلی قیزلارا «آزاد تحصیل محیطینین» یارادیلاجاغیندان دانیشیر. مشهور مثال‌دا دئییلدیی کیمی، «دینیمه سؤیه‌ن باری مسلمان اولسا». ایرانداکی موجود وضعیتله آزاد تحصیل محیطی ترس متناسیبدیر. بو اؤلکه‌ده تکجه ۴۰ میلیون آذربایجانلینین یوخ، حجاب مجبوریتینه قارشی چیخان، آزاد یاشاماق ایسته‌یه‌ن بوتون قیزلارین تحصیل آلماسینا امکان وئریلمیر. هر شی بونونلا دا یکونلاشمیر، حجاب مجبوریتینه اعتراض ائد‌ن قیزلار تکجه مکتبلره، اونیورسیتتلره بوراخیلمیر، هم ده قتله یئتیریلیر. ۲۰۱۷-۲۰۱۸-جی ایللرده باش وئرن «ایران کوچه‌لرینین قیزلاری» حرکاتیندا، ۲۰۲۲-جی ایلده حجابینی چیخاران ۲۲ یاشلی مهسا امینینین پلیس طرفیندن قتله یئتیریلمه‌سینه اعتراض اولاراق باشلانان آکسییالاردا ایرانلی قیزلار اؤلومله اوز-اوزه قالدیلار. سیمایی صرافین آذربایجانلی قیزلارا «آزاد تحصیل محیطی» وعد ائتدیی ایراندا قیزلار حجاب مجبوریتینه اعتراض ائتدیکلری اوچون تحصیل حقوقوندان محروم ائدیلیر، کوچه‌لرده دؤیولور، اؤلدورولور. اوچونجوسو، ایرانین مقصدی آذربایجانلی قیزلارا تحصیل وئرمک یوخ، اؤز ایدئولوگییاسی ایله بئیینلری یویولموش شبکه یاراتماقدیر. ایللردیر آذربایجاندا حیاتا کئچیرمک ایستدیکلری سیاست بونو دئمه‌یه اساس وئریر. ایرانین دینی-کلریکال دایره‌لرینین یاراتدیغی «مسلمان بیرلیگی حرکاتی»، همچنین ایراندا آذربایجان وطنداشلاریندان عبارت یارادیلان «حسینیون» ترور گروپلاشماسی بئله نمونه‌لردندیر. بو باخیمدان، آذربایجانلی قیزلارین تحصیل آدی ایله ایرانا دعوت ائدیلمه‌سینین اونلاری اؤز ماراقلارینین آلتینه چئویرمک مقصدی داشیدیغی سر دئییل. آذربایجان خالقی آییق اولمالی، ایراندان ائدیله‌ن بئله چاغیریشلارا آلدانمامالیدیر. ایرانلی ناظیر سیمایی صراف دا یاخشی اولار کی، آذربایجانا دیل اوزاتماق عوضینه اؤلکه‌سینده‌کی ۴۰ میلیون آذربایجانلینین، ائلجه ده حجاب مجبوریتینه اعتراض ائد‌ن قیزلارین تحصیل حقوقونون پوزولماسیندان، شاللاقلانماسیندان، اؤلدورولمه‌سیندن دانیشسین. دانیشا بیلمیرسه، سوسسون. آذربایجانین داخلی ایشلرینه نه‌اینکی ایران، هئچ بیر اؤلکه قاریشا بیلمز. اگر ایران بونا جهد ائدیرسه، او زمان آذربایجان دا بو اؤلکه‌ده حجاب مجبوریتیندن آزاد اولماق ایسته‌یه‌ن، بونا گؤره مکتبلره، اونیورسیتتلره بوراخیلمایان قیزلاری تحصیل آلماق اوچون دعوت ائده بیلر.