دونیا نئفت بازارین‌دا باش وئره‌ن دییشیکلیکلرله باغلی کئچمیش مالییه ناظری فیکرت یوسیفووون آخار. آذ-ا موصاحیبه‌سینی تقدیم ائدیریک:

- دونیا نفت بازاریندا سون گونلر ماراقلی پروسسلر یاشانیر. نفت قیمتلرینده اولان بو آرتیمی نئجه دیرلندیریرسینیز؟

- دونیا بازارلاریندا نفتین قیمتلرین‌ده ۲۰۱۴-جو ایلین اورتالاریندان باشلایان کسکین آزالمالار ۲۰۱۶-جی ایلین یانوار آییندا اؤزونون ان آشاغی حدینه - بیر بارل اوچون ۳۲،۱ دلارا ائندی. بوندان سونرا قیمتلرده موختلیف زامان کسیینده معین اوینامالار اولسا دا، اساساً، یوکسه‌له‌ن خطله آرتاراق بوگونکو سوییه‌یه - یعنی بیر بارل اوچون ۸۵ دلارا چاتدی. قیمتلرده سون آیلار عرضین‌ده باش وئره‌ن داواملی یوکسلیشه متخصصلر موختلیف ایضاحلار وئرسه‌لر ده، آرتیم بیلاواسیطه دونیا سیاسی موستویسینده باش وئرن پروسسلرله باغلیدیر. ایلین سونونا قدر نفتین قیمتلرینین ۱۰۰ دلارا قدر آرتاجاغی ایله باغلی پروقنوزلارین دا رئاللیغینی قبول ائتمک اولار. چونکی نویابر آیینین ۴-دن اعتباراً بیرلشمیش ایشتاتلارین ایران نفتینین ساتیشینا قویدوغو امبارقو قوه‌یه مینه‌جک.

- سانکسییالارین تطبیقیندن سونرا نه گؤزلنیلیر؟

- ایران آرتیق بو سانکسییالارین بیان ائدیلدیی واختدان نفتینی کیملره، هانسی یوللارلا و هانسی شرطلرله ساتماق ایستیقامتینده آراشدیرملار آپارماقلا مشغولدور.

- بو ایشلر نه قدر ثمره‌لی اولاجاق؟ ایران امبارقویا قدر بازارا چیخاردیغی ۲،۵ میلیون بارل نفتین هان‌سی حیصه‌سینی ساتا بیله‌جک؟

- بللی مسئله‌دیر کی، بو یوللا ساتیلان نفتین قیمتی دونیا بازارلاریندا ساتیلان نفتین قیمتلریندن بیر خئیلی آشاغی اولاجاق. دئملی، ایران قاداغالار قوه‌یه میندیکدن سونرا قیمتلرین آشاغی اولماسی حسابینا دا ایتکیلره معروض قالاجاق. دیگر طرفدن، اونون امبارقونون تطبیقیندن سونرا نفت ساتیشی حجمی کسکین آزالاجاق. بو ایسه ایران اقتصادیاتینا نؤوبتی جدی زربه، دونیا بازارلارین‌دا نفتین قیمتلرینین یوکسلیشینه ایسه بیر تکان اولاجاقدیر.

- بعضی اکسپرتلر نفت قیمتلرینین باهالاشماسی فونوندا ایل عرضینده اؤلکه‌میزه داخیل اولاجاق علاوه وسایتین ۱۰ میلیارد دوللارا چاتاجاغینی پروقنوزلاشدیریر...

- تخمینی حسابلامالار ائلدیر، دقیق رقم، البته، ایلین سونوندا بللی اولاجاق. حساب ائدیره‌م کی، بیز بو علاوه وسایتدن دوزگون ایستیفاده ائتمکله غیری-نفت سکتورونون اینکیشافیندا اهمیت‌لی سیچراییش ائده بیلریک. ایلک نؤوبه‌ده نفت پوللاری حسابینا والیوتا احتیاطلاریمیزی ماکسیموم آرتیرا و بو حسابا الده ائدیلن گلیرین بیر حیصه‌سینی بیلاواسیطه یئرلرده کیچیک و اورتا ایستحصال و اعمال موسسه‌لرینی یارادیلماسی اوچون بیزنئس لاییحه‌لرین چوخ گذشتلی شرطلرله کردیتلشدیریلمه‌سینه یؤنلده بیلریک. بو گون دؤولت خطی ایله بیزنس لاییحه‌لرین مالیه لشدیریلمه‌سی اوچون آیریلان وسایتین حجمینی نفتین قیمتلرینین کسکین آرتماسیندان داخیل اولان گلیرلر حسابینا ۱۰ دفعه‌یه قدر ده آرتیرماق مومکوندور. بیزیم نفتین قیمتلرینه گوونجیمیز یوخدور. اؤلکه پرزیدنتی بونو دفعه‌لرله بیان ائدیب. بو گون باشلانیلان اقتصادی اصلاحاتلار یاخین زامانلاردا اؤلکه اقتصادیاتینین غیری-نفت سکتورون‌دا اینقیلابی بیر دؤنوشو هدفله‌ییب. بو دؤنوشه نایل اولماغین ان دوزگون یولو دا نفتین ساتیشیندان الده اولونان علاوه گلیرلرین بیر حیصه‌سینین بیزنئس موحیطین قالدیریلماسی ایستیقامتین‌ده خرجله‌نمه‌سی اولا بیلر.