آمریکا و ایران آراسیندا گئدن گیزلی دانیشیقلار دونیادا نفتین اوجوزلاشماسینا گتیریب چیخاریر.

بو سؤزلری آخار.آذ-ا اقتصادچی اکسپرت ناطیق جعفرلی سون گونلر نفتین قیمتینین کسکین اوجوزلاشماسینین سببلری حاقین‌دا دانیشارکه‌ن دئییب.

او بیلدیریب کی، نفتین قیمتینین ائنمه‌سینین اساس سببیندن بیری دونیادا گئدن اقتصادی ساواشلاردیر:

«نفتین قیمتینین آشاغی دوشمه‌سینین اساس سببی دونیادا داوام ائد‌ن تیجارت محاربه‌لری‌دیر. آمریکا و چین آراسین‌دا اولان تیجارت محاربه‌سینین پیک حده چاتماسی قیمتلره چوخ جدی تأثیر ائتدی. دونیادا تیجارت محاربه‌لری گئنیشلندیکجه، گمروک روسوملاری و وئرگی درجه‌لری آرتدیقجا اقتصادی آرتیم آزالیر و بو دا نفته طلباتی آزالدیر. بونون نتیجه‌سی اولاراق، بو گون دونیا بازاریندا نفتین قیمتین‌ده کسکین اوجوزلاشما گئدیر. داها بیر سبب اوندان عبارت‌دیر کی، هله تصدیق اولونمامیش معلوماتلارا گؤره، آمریکا و ایران آراسین‌دا آرتیق گیزلی دانیشیقلار باشلاییب. حساب ائدیره‌م کی، ایکی اؤلکه آراسین‌دا اولان گرگینلیین آرادان قالخما احتیمالی پسیخولوژی اولاراق نفتین قیمتینه منفی تأثیر ائدیر».

ایقتیصادچینین سؤزلرینه گؤره، نفتین قیمتینین آرتماسینا آنجاق حربی گرگینلیکلر سبب اولا بیلر:

«نفتین قیمتینین اقتصادی سببلردن دولایی یاخین زامانلاردا قالخماسی گؤزلنیلمیر. لاکین سیاسی بیاناتلار و حربی گرگینلیک هر زامان نفتین قیمتینه جدی تأثیر گؤستریر. حساب ائدیره‌م کی، بو دفعه ده بئله گرگینلیک یاشانارسا، نفتین قیمتی یئنی‌دن آرتاجاق. مثلاً، ایرانلا سعودییه و یا آمریکا ایله ایران آراسین‌دا سیاسی گرگینلیک آرتارسا، نفتین قیمتی حتی ۱۰۰ دلاری دا کئچه بیلر. همچینین اوپئک اؤلکه‌لری سؤزلو موداخیله‌لرله حاصیلاتی آزالداجاقلاری ایله باغلی بیاناتلار وئرسه، بو دا نفتین قیمتینه تأثیر ائده بیلر».

اقتصادچی نفتین قیمتینین ائنمه‌سینین آذربایجان اقتصادیاتینا اولان زیانی حاقین‌دا دا دانیشیب:

«آذربایجانین دؤولت بودجه‌سین‌ده نفت قیمتی ۶۰ دلاردان حسابلانیب و بونا گؤره ده ۶۰ دلارا قدر اولان قیمت بیزیم اقتصادیاتیمیزا تأثیر گؤسترمه‌یه‌جک. همچینین آذربایجان نفت فوندوندا علاوه وسایتلرین اولماسی حتی ۵۸ دلارا قدر اوجوزلاشمانین اؤلکه اقتصادیاتی اوچون منفی تاثیرلرین یارانماسینین قارشی‌سینی آلاجاق. لاکین بونا باخمایاراق، بئله حاللار پسیخولوژی گرگینلییه سبب اولا بیلر. بو، اساساً ده بانک سکتورون‌دا داها چوخ حس اولونار.

لاکین نفتین قیمتینین ۵۸ دلار و یا داها آشاغی دوشمه‌سی اقتصادیاتیمیزا تأثیر گؤستره‌جک».

قید ائدک کی، «برنت» مارکالی نفت سون ۴ گون عرضین‌ده ۱۰ دلارا یاخین اوجوزلاشیب و حاضردا ۶۱ دلار جیواریندادیر.