سون گونلرده ایران‌دا آمریکا دلاری ایکی‌قات باهالاشاراق، ۶۰۰ مین ریالا چیخمیشدی. اصلینده، دلارین دیری قالخماییب، ریال دیردن دوشوب. مسئله‌یه بو جور یاناشساق، دورومو داها دوزگون قیمتلندیره بیلریک. چونکی ریال تکجه دلار دئییل، آورو، مانات، روبل و دیگر والیوتالار قارشی‌سیندا دا دیرینی ایتیریب.

بو سؤزلری Axar.az-آ اقتصادیات اوزره گونئی‌لی اکسپرت صابر زامانی ایراندا دلارین باهالاشماسینا آیدینلیق گتیررکه‌ن دئییب.

او بیلدیریب کی، سون بیر ایلده رسمی آچیقلامالارا گؤره، ریال ۸۰ فایز دیر ایتیریب:

«دولت دوللارین باهالاشماسیندا خاریجی فاکتورلار آختارماغا چالیشیر، بو باره‌ده دانیشیلماسینا اجازه وئرمیر، اصلینده، سبب بودجه کسرینین اؤرت-باسدیر ائدیلمه‌سیدیر. هر بیر اؤلکه‌نین پولونون دیرله‌نمه‌سی و دیردن دوشمه‌سی ایکی فاکتوردان آسیلیدیر: بو اؤلکه بیر ایلده نه قدر پول چاپ ائدیب، ایستحصال گوجو نه قدردیر؟ اما ایران چالیشیر کی، بونو باشقا اؤلکه‌لره باغلاسین. سانکسییالارا، امبارقولارا گؤره اولدوغونو دئییرلر. بونلارین تأثیری قیسما ده اولسا وار، اما بو، یئنی بیر مسئله دئییل. سانکسییا هر زامان اولوب. بونلار ریالین سون آیلارداکی دیر ایتیرمسینین سببی دئییل. اساس سبب بودجه کسیریدیر. ایران اقتصادیاتینین قورولوشو بئله‌دیر کی، نفت و گاز ساتیر و گلیرلری دلارلادیر. اما خرجلری ریاللا اؤدییر. اوردویا پولو ملی والیوتا ایله وئریر. اودور کی، دلار باهالاشدیقجا، ریال دیرینی ایتیریر و دولت بودجه‌نی داها راحت قارشیلایا بیلیر. بو، چوخ اؤنملی مسئله‌دیر».

اکسپرت هم ده بیلدیریب کی، خاریجی والیوتانین ۹۰ فایزی دؤولتین، ۱۰ فایزی خالقین الین‌ده‌دیر.

«هرطرفلی باخدیق‌دا، گؤروروک کی، ریالین دیردن دوشمه‌سی ایران رژیمینین یارارینادیر. بو، بیر اقتصادی سیاستدیر کی، ایران رژیمینی ایر‌لی آپاریر. رژیم ایستییر کی، بودجه کسیرینی دلارین باهالاشماسی ایله آرادان قالدیرسین. خاریجی والیوتانین باهالاشماسی هر نه قدر ایران رژیمینین خییرینه اولسا دا، خالقین ضررینه‌دیر. میللت بؤیوک بیر اینفلیاسییا عرفه‌سینده‌دیر. یاخین آیلاردا ریالین دیردن دوشمه‌سی ایله بؤیوک اینفلیاسییا اولاجاق. خصوصیله، درمان و قیدا محصوللاری خیلی درجه‌ده باهالاشاجاق. حاضردا قیدا محصوللارین‌دا اینفلیاسییا ۶۵ فایزدن چوخ آرتیب و بئله گئدرسه، داها دا چوخالاجاق».