ایران عرب اؤلکه‌لری ایله دیپلماتیک مناسبتلری یاخشیلاشدیردیقدان سونرا عرب کؤرفزینده گاز قووشاغی یاراتماق فکرینی رئاللاشدیرماق ایستییر. اون ایلدن چوخدور کی، موجود اولان بو ایدئیا عرب اؤلکه‌لری ایله گرگینلیک و خارجی سیاستده‌کی یانلیشلیقلار سببیندن باش توتموردو.

بو سؤزلری Axar.az-آ گونئی‌لی اقتصادچی صابر زمانی ایرانین بین‌الخالق گاز قووشاغی یاراتماق فکرینه مناسبت بیلدیررکن دئییب.

اونون سؤزلرینه گؤره، ایران بو گاز قووشاغینی یاراتماقلا بؤلگه‌ده اهمیتینی آرتیرماق ایستییر:

«دنیا گازینین ۱/۳-ی عرب کؤرفزینده‌کی هرمز بوغازیندان کئچیر. دنیانین ۲۵ فایز گازی کؤرفزدن چیخاریلیر. بؤیوک استراتژی اهمیتی اولان بیر یئردیر. اگر بیر بؤلگه‌ده انرژی دهلیزی وارسا، گاز و نفت بوروسو اورادان کئچیر، گمیلرین کئچیدی اوچون بوغاز وارسا، او یئر استراتژی اهمیتلی بیر بؤلگه ساییلیر. هئچ بیر اؤلکه اورادا محاربه و گرگینلیک اولماسینی ایستمیر. ایران دا همین جغرافییانین استراتژی اؤنمینی آنلاییر و اؤز اهمیتینی داها دا آرتیرماق اوچون گاز قووشاغینین یارادیلماسینا ماراق گؤستریر. اما ان اؤنملی مسئله اوپک-دیر. نفتله باغلی تنظیملییجی بین‌الخالق تشکیلات مؤوجود اولسا دا، گازلا باغلی یوخدور. یاراتماغا چالیشیرلار. گاز قووشاغینین ایرانین گونئیینده یارادیلماسی تهرانین رولونو و اهمیتینی اوپک-ده گوجلندیره بیلر».

ایرانین رئال دورومو ایله خیاللارینین اوزلاشمادیغینی دئیه‌ن اقتصادچی بو لایحه‌نین تئزلیکله گئرچکلشمه‌سینین ممکون گؤرونمدیینی بیلدیریب:

«ایران هر نه قدر بئله بیر قووشاغین یارادیلماسینی ایسته‌سه ده، بونو رئالیزه ائتمک اوچون سیاسی و اقتصادی گوجو یوخدور. ائله اؤتن قیش آیلاریندا ایرانین بیر چوخ شهرینده گاز کسیلمیشدی. گازی دپولاماغا امکانی یوخ ایدی. دنیانین گاز قووشاغینی نئجه یارادا بیلر؟»

صابر زمانینین بیلدیریب کی، اصلینده، بو ایشلرین آرخاسیندا دایانان بؤیوک اویونجو ایران یوخ، چیندیر:

«دوشونورم کی، بو مسئله‌نی گوندمه گتیرن چین و عربستاندیر. ایرانا دستک وئرن ده اونلاردیر. همچینین، ایرانین چینله ۲۵ ایللیک بیر راضیلاشماسی وار. حتی عربستانین انرژی ناظری ایرانین انرژی اینفراستروکتورونو گوجله‌ندیرمه‌یه، اورا سرمایه یاتیرماغا حاضر اولدوقلارینی دئییب. بوتون بونلاری نظره آلدیقدا، ایرانین هدفلدیی بازارین چین اولدوغونو دئمک اولار».

قید ائدک کی، ایرانین نفت ناظری جواد اوجی عرب کؤرفزی ساحللرینده روسیا، تورکمنیستان و قطرین اشتراکی ایله بین‌الخالق گاز قووشاغینی یاراتماق ایستدیکلرینی دئییب.