آنا صحیفه ایقتیصادیات |
قازاخیستان روسییادان یان کئچن نقلیات دهلیزیندهکی پروبلملرین آرادان قالدیریلماسی اوچون یئنی سعیلره باشلاییب، آذربایجان و گرجستانلا بیرگه لجیستیکا شیرکتی یاراتماق بارهده راضیلیغا گلیب. سازیش اؤتن هفته قازاخیستانین باش ناظری علیخان ایسماییلووون جنوبی قفقازا سفرینین سونوندا ایمضالانیب.
Axar.az خبر وئریر کی، بو بارهده «اوراسیانت» معلومات یاییب.
«شیرکتین یارادیلماسیندا مقصد چین و آوروپا آراسیندا یوکلرین داشینماسی پروسئسینی و حسابلاشما پروسسینی سادهلشدیرمک اولاجاق. ترانسخزر بینالخالق نقلیات مارشروتو و یا اورتا دهلیز پرسپکتیولرینین پسیمیست تحلیلی تئز-تئز یوکلرین بیر چوخ دولت سرحدلرینی کئچمهلی اولدوغونا ایشاره ائدیر. آذربایجان-گرجستان-قازاخیستان لجیستیکا شیرکتی بو مانعهنی آرادان قالدیرماغین بیر یولو کیمی گؤرونور.
آرتیق ماللارین کئچیدینین آسانلاشدیریلماسیندا مهم ایرلیلییش الده اولونوب. قازاخیستان صنایع و اینفراستروکتورون اینکیشافی ناظرلیگی بیلدیریب کی، چیندن ترانسخزر مارشروتو ایله ماللارین آوروپایا چاتدیریلما مدتی سون بیر ایلده ۵۳ گوندن ۱۸-۲۳ گونه ائنیب. مقصد بو رقمی داها دا آزالدیب، ۱۰-۱۵ گونه سالماقدیر. یوکلرین فیزیکی حجملری نسبتا کیچیک اولسا دا، تندنسییا مثبتدیر. ایلین اولیندن ایون آیینادک مارشروت اوزره چکی اساسیندا یوکداشیمالارین حجمی ۱ میلیون تونو اؤتوب کی، بو دا اؤتن ایلین موافیق دؤورو ایله مقاییسهده ۶۴ فایز چوخدور. لاکین افکتیو کووردیناسییا یولو ایله چاتدیریلما مدتلری آزالدیلا بیلسه ده، یئنی اینفراستروکتورا سرمایه قویمادان حجملری آرتیرماق ممکن دئییل"، - معلوماتدا دئییلیب.
قید اولونور کی، ترانسخزر بینالخالق نقلیات مارشروتو آسوسیاسییاسینین باش کاتیبی قایدار آبدیکریموو خزرین ترانزیت پوتنسیالینی ان چوخ محدودلاشدیران «داربوغاز» جنوبی قفقاز اولدوغونو دئییب:
«اونون سؤزلرینه گؤره، ضعیف لیمان اینفراستروکتورو ایمکانلاری محدودلاشدیریر و تیخاجلارا سبب اولور. گرجستانین باش ناظری ایراکلی قاریباشویلی ده ایسماییلوولا گؤروشو زامانی بو پروبلمی اعتراف ائدیب: «بیز مارشروتداکی داربوغازلاری آرادان قالدیرماق و اورتا آسییا، چین و عمومیلیکده دیگر آسییا اؤلکهلری اوچون اورتا دهلیزی داها دا جلبائدیجی ائتمک اوچون امکداشلیق ائدیریک».
ایسماییلووون سفری زامانی بیر چوخ باشقا سؤودلشمهلر ده اولوب. اونون آذربایجانلا ایمضالادیغی ۱۰ ایکیطرفلی سازیشدن بیرینده ایکی اؤلکه آراسیندا هفتهده اجازه وئریلن اوچوشلارین سایینین ۳۲-دن ۴۲-یه چاتدیریلماسی نظرده توتولور. آستانا بیلدیریر کی، مقصدی آذربایجانا ایخراجی ایکیطرفلی تجارتده ۲۰۲۲-جی ایلده قیده آلینان ۵۰۰ میلیون دلاردان ۱ میلیارد دلارا چاتدیرماقدیر.
گرجستاندا باغلانان سؤودلشمهلر آراسیندا قازاخیستانا مخصوص اولان و قازاخیستان نفتینین قارا دنیز بازارینا چیخیشینی تامین ائدن باتومی نفت ترمینالینین گوجونون آرتیریلماسینا دایر راضیلاشما دا وار. بو دهلیز قازاخیستانین نفت اخراجیندا روسییا اراضیسیندن آسیلیلیغینی آزالتماق ایستراتگییاسینین خصوصیله مهم ترکیب حیصهسی کیمی قیمتلندیریلیر".
تاریخ
2023.06.30 / 10:54
|
مولف
زینب اکبر
|