۲۱ فئورال بین‌الخالق آنا دیلی گونو موناسیبتیله بو گون تبریزین بیر سیرا الکترون نشرلری خبر و یازیلارینی آذربایجان تورکجه‌سینده پایلاشاجاقلار.

Kult.az خبر وئریر کی، بو باره‌ده تبریزین "آذرانجمن" نشری معلومات یاییب.

"بیلدییمیز کیمی آنا دیلی هر میلتین اساس وارلیقلاریندان بیری ساییلیر و بو، هر بیر شخصین کیم‌لیک، کولتور و شخصیتینده اؤنملی رول اویناییر. آنا دیلینین اهمیتی اؤلکه‌میزده آرتیق چوخلو انسانلارا آیدین اولوب و اونون داها آرتیق قورونماسینا و گله‌جک نسله اؤتورولمه‌سینه اؤنم وئریلیر"،- تبریز نشری یازیب.

"آذرانجمن" آذربایجان تورکجه‌سینین ایران‌دا رسمی شکیلده تدریس ائدیلمه‌سینین واجیبلیینی بیلدیریب:

"امید ائدیریک کی، تورک دیلی ایران‌دا بیر تحصیل دیلی کیمی رسمیت قازانسین و بو واسطه ایله اؤلکه انسانلارینین یاریسینین آنا دیلی قورونسون، تورک دیلینین بین‌الملل اهمیتینی نظره آلاراق، اؤلکه‌نین اجتماعی و مدنی انکیشافینا یاردیمجی اولسون!".