بو گون گؤرکم‌لی آذربایجان ساتیریکی میرزا علی‌اکبر صابرین دوغوم گونودور.

Kult.az بو مناسیبتله شاعرین سئچمه شعیرلریندن بیرینی تقدیم ائدیر:

پای پیاده دوشورم چؤللره،–
خار مغیلان گؤرورم قورخمورام.

سئیر ائدیرم بر و بیابانلاری،–
غول بیابان گؤرورم، قورخمورام.

گاه اولورام بحرده زورق نشین،–
دالغالی طوفان گؤرورم، قورخمورام.

گه چیخیرام ساحله، هر یاندا مین،–
وحشی غران گؤرورم، قورخمورام.

گاه شفق تک دوشه رم داغلارا، –
یانغیلی ولکان گؤرورم، قورخمورام.

گه أنیرم سایه تک اورمانلارا،–
ییرتیجی حیوان گؤرورم، قورخمورام.

اوزقویورام گاه نیستانلارا،–
بیر سورو آسلان گؤرورم، قورخمورام.

مقبره لیگده ائدیرم گه مکان،–
قبرده خورتدان گؤرورم، قورخمورام.

منزل اولور گه منه ویرانه لر،–
جین گؤرورم، جان گؤرورم، قورخمورام.

بو کرۀ ارض ده من، مختصر،–
مختلف الوان گؤرورم، قورخمورام.

خارجی مولکنده ده حتی گزیب،–
چون تحاف انسان گؤرورم، قورخورام.

لیک بو قورخمازلیق ایله، دوغروسی،
آی داداش! وآللاهی، بآللاهی، تآللاهی!
هاردا مسلمان گؤرورم، قورخورام!…

بی سبب قورخمئیورام، وجهی وار:
نئیله ییم آخر، بو یوخ اولموشلارین،
فکرینی قان – قان گؤرورم، قورخورام،
قورخورام، قورخورام، قورخورام!…