آذربایجان ادبیاتی نین سئویلن شاعیرلریندن نصرت کسمنلی 1946-جی ایلده قازاخ رایونوندا آنادان اولوب. او, "سئویرسنسه" (1971), "گؤزلریمین قاراسی" (1975), "اؤزومه بنزه دیگیم گونلر" (1979), "گوموش یوخولار" (1981) , "تکلیکده دانیشاق" (1983) کیتابلارینین مولیفی دیر. شاعیرین شعیرلرینده بستَله نن ماهنیلار دیللر اَزبری دیر.

قئید ائده کی, بؤیرک چاتیشمازلیغیندان اذیت چکن نصرت کسمنلی موعالیجه اولونماق اوچون تبریزه گئدیب و 2003-جو ایلده ائله اوراداجا دونیاسینی دییشیب.

آخار.آذ نصرت کسمنلی نین مشهور "بیری واریدی, بیری یوخ..." شعیرینی تقدیم ائدیر:

اولان اولوب, کئچن کئچیب بلکه ده

ایندی داها کؤورلمه یین یئری یوخ

عؤمور بویو بئله گلیب منیم کی

اولیندن بیری واریدی بیری یوخ

اوزاقدایدی من ایسته ین اوجاقلار

اوره ییمدن گلیب کئچدی سازاقلار

آتالییدی, آنالییدی اوشاقلار

بیزیم ائوده بیری واردی, بیری یوخ

گؤزلریمده دولدورموشام یاغیشی

بیر کؤینکده چیخارمیشام من قیشی

شالوار-پئنجه ک گئیینیردی تای-توشوم

منده ایسه بیری واردی, بیری یوخ

اوزوم گولدو, طلبه یم دئیه نده

سیخیلیردیم دوست پئنجه یی گئینده

موعلیمله دیل تاپا بیلمه ینده

قیمتلریمین بیری واردی, بیری یوخ

قلبیم یاندی ایلک سئوگیمدن, عشقیمدن

دارا دوشدوم, اَل اوممادیم هئچ کیمدن

مجلیسلرده جان دئییب جان ائشیدن

دوستلاریمدان بیر واردی, بیری یوخ...

من اوردویا نَلر گؤروب گئتمیشدیم

اوره ک آلیب, اورهک وئریب گئتمیشدیم

ایکی قیزا کؤنول وئریب گئتمیشدیم

قاییداندا بیری واردی, بیری یوخ

اوزاق گَزدی عمی, دایی, بی بی لر

سؤز آراسی منه ائولن دئدیلر

نیشان اوچون ایکی شی ایسته دیلر

منده ایسه بیری واردی بیری یوخ

واخت گله جک بو گونو گؤره جکسن

چ.خ سئوالا گؤزونو دؤیه جکسن

واخت گله جک سن اؤزون دئیه جکسن

دئیه جکسن: " بیری واردی, بیری یوخ!"