خسرو باریشان ۲۹ یانوار ۱۹۸۳-جو ایلده تبریز شهرینده آنادان اولوب. او ایلک و اورتا مکتبی تبریزده بیتیریب. داها سونرا شبیستر اونیوئرسیتئتینین بایتار (حئیواندارلیق) موهندیس‌لیگی بؤلومونده عالی تحصیل آلیب. خسرو کیچیک یاشلاریندان شعر یازماغا باشلاییب.

گؤیه باخیرام، گؤیه...

درین بیر بیلمه‌جه‌دیر

چؤزه بیل‌سَه م گؤزلریوی.

هارادان باشلاییر گؤزلرین،

هارادا بیتیر؟!

آختاریرام.

قانادلانیب

گؤزلرینله باخا بیلسه‌م دونیایا...

گؤی‌دن

وطنیمی بیر اؤلکه کیمی گؤره بیلسه‌م...

سیاست میدانیندان قاچا بیلسه‌م...

شاعیر اولسام...

گؤزلرین گؤزلویوم اولسا...

گونشین توپراغیمدا هانسی یؤندن چیخدیغینی گؤره بیلسه‌م...

گئجه‌نین باغریندا، آلتیندا آیین ایشیقلارینی دره بیلسه‌م...

تبریزی دولانیب اینسانلارا باخسام...

یورولسام...

اوتوروب بیر بوجاقدا

وورولسام گؤزلریوه...

آه... او شیطان اوشاقلیغیم

گؤزلویومو بیردن قاپیب قاچسا...

سالیب سیندیرسا...

اللاها آند اولسون

بؤیویوب بو دفعه کور اولاجاغام!