آلما موغانلی ۱۹۹۰-جی ایلده تئهران‌دا آذربایجانلی عائیله‌ سینده آنادان اولوب. نووه موهندیس‌لییی و فیزیکا فاکولته سینی بیتیره ن آلما, ۱۵ یاشیندا شعیر یازماغا باشلاییب. اونون ایلک شعیر توپلوسو "پیچاقلانمیش هئیوا" کیتابی ۲۰۰۷-جی ایلده چاپدان چیخیب.

کیمسه‌سیزلییه ایکی خیاوان قالا

و اوچ آددیم سن‌سیزلیکدن اؤته

آغ چیزگیلر بویدا بیر اوچورومدا دورموشام

و کؤنلوم تاب با تاراب

آددیملاییر بوشلوغا دوغرو

توستودور نفس چکیر ایچیمده

و هر آن چوخالان ترافیکدیر

اوتوروب اورییمده سیگنال چالیر

تانیش قوخولار چیرپیلیر اوزومه

و بئینیمی آختاریر

بیریسی ائشییه چیخیر

اَن دیبیم‌دن...

چیچک‌چیلره یالواریشلاریمین سَسی

دوشور آرابالارین بئینینه

کسیک-کسیک آغاریرام آرابالار آلتیندا

قیریق-قیریق بوشالیرام تکرلرین آلتیندا

و بوتون قیرمیزی ایشیقلاری دوردورورام

شهرین ایشیقلاری گؤز وورور گؤزوم‌ده

گؤزومده ائولر تیکیلیر

گؤزومده ائولیلیک لر ییخیلیر

دیوارلار سورتولور بارماقلاریما

دیوارلار ییرتیلیر

دیوارلار قاناییر

نم کیمین آدی‌دیر

سسله نیر کوچه‌لرده

بوغازیمدا قارغالار چیغیریر...

قارغالار آغاریر...

و یاشیل بارماقلیق لار

آیاقلاری‌می قاچدیریر

بارماقلیق لار قاچیر بؤیرومده

آغاجلار قاچیر مندن

سویون اوستونده موزاییک لر شاببیلداییر...

اللریم یاپیشیب بؤیرومه

بارماقلاریمی آختاریر

بارماقلاریم دیوارلاردا اونودولموش

دیزلریم قاتلانیر

موزاییک لر دیزلریمی اؤپورلر

بئینیمی اؤپورلر موزاییک لر

او قدر کی، قان داملاییر دوداقلاریمدان

کیم‌سه‌سیزلییه ایکی خیاوان قالا

سنسیزلیک‌دن اوچ آددیم اؤته

بیر شهر ییخیلیر...