پرویز جبراییل چاغداش آذربایجان ادبییاتینین تانینمیش سیمالارینداندیر. او، ۱۹۷۱-جی ایل یانوارین ۱۸-ده بیله سوار رایونونون عصمتلی کندینده آنادان اولوب. "اؤلنگی"، "هر صاباح یاشام"، و "یاد دیلده" کیتابلارینین مؤلفی اولان پرویزین اثرلری ادبی حادیثه کیمی قیمتلندیریلیب.

اونون "یاد دیلده" روُمانی "نسیمی" ادبی مسابیقه سینده "ایلین روُمانی" سئچیلیب. همچنین "کولت آذ" و ام کا ام ادبی پورتاللاریندا اوخوجولار آراسیندا کئچیریلن سس وئرمه ده "ان یاخشی اثر" نوُمیناسیاسیندا بیرینجی اوُلوب. بوندان باشقا "یاد دیلده" آذربایجان ادبی محیطینده حاظیردا ان عالی مکافات ساییلان " مللی کیتاب مسابیقه سی"نین قالیبیدیر. "یاد دیلده" روُمانی تبریزده آذربایجان دیلینده نشر ادیلیب. "هر صاباح یاشام" شعرلر کیتابی ایسه ایراندا فارس دیلینده ایشیق اوزو گؤروب.

رومی

سئودیین قادینلارا
شعیرلر یازارسان
گؤزل‌دن گؤزل،
قزل‌دن قزل.

شعیرلرین گؤزل اولار
سئودیین گؤزل‌دن گؤزل.

بیر آزدان نه سنین الین چاتار او گؤزل‌لییه،
نه او قادینلارین.
یولا سالارسان بیر-بیر.

بیر گون بیری گلر،
آدام شعیردن شعیر،
شعیردن ازل.

شعیرین الی چاتماز اونا،
بو دفعه شعیری یولا سالارسان، گئدر
یولا سالدیغین قادینلارین یولویلا
بیریوللوق،
بند-بند،
سطر-سطر

دئیرسه‌ن،
باشیما سن گلنی سؤز گلمیر...
سن ده سؤزموشسه‌ن دئمه...

***

یاراسا عشقی

نه سن منه گلدین،
نه من سنه بیرینجی.
گئتمز کی، کیمه‌سه، یا دا هاراسا،
سسینین دالییجا اوچار یاراسا.
من یئنه گؤیلرده گزیرم سنی
بیر اؤلو اومید وار
الیم‌ده عصا...

نه سن منه گلدین،
نه من سنه بیرینجی.
کیم کیم‌دن بیرینجی گئتدی، بیلمدیم...