آذربایجان تاریخینده ان ضدیتلی شخصیت اولان میرجعفر باغیروولا مشهور رققاصه، خالق آرتیستی امینه دیلبازینین مکتوبلاشماسی اوزه چیخیب.

آخار. آذ خبر وئریر کی، آدیگؤزل ممدووون "باش توتمامیش چئوریلیش" کیتابیندا امینه دیلبازینین رپرسییادان قورتولماق اوچون باغیروا مکتوب یازماسی ایله باغلی فاکتلار یئر آلیب. امینه دیلبازی "۵۲۵-جی قزئت"این ۱۹۹۷-جی ایل ۲۹ اوکتیابر تاریخلی ساییندا سواللاری جاوابلاندیریب:

- امینه خانیم، نئجه اولدو کی، ۳۷-جی ایلده صنعت آداملارینا قارشی اولان تضییقلر سیزدن یان کئچدی؟ دئییلنه گؤره، میرجعفر باغیروو سیزین صنعتینیزه پرستیش ائدیرمیش.

- بی نسلیندن اولدوغوما گؤره منه و صنعتیمه هر وجهله مانع اولماغا چالیشیردیلار. منی کومسومولا کئچیرمدیلر. باشا دوشدوم کی، کومسومولا قبول ائتمه‌ییبلرسه، پارتییایا دا کئچیرمه‌یه‌جکلر (بهانه‌لری ده او اولوردو کی، بی نسلیندنم، گویا، باجیم ایرانا اره گئدیب، جاسوسدور و س.). بوتون بونلارسیز ایسه منیم صنعتده اوغورلاریم عبث اولاجاقدی. بیر سؤزله، منی یوخ ائتمک ایستییردیلر. او واختلار بیزیم رقص قروپو فعالیت گؤستریردی. میرجعفر باغیروو بیزه خصوصی دقت یئتیریردی. گلیردی، چیخیشلاریمیزا تاماشا ائدیردی. بوتون بو تضییقلری گؤروب قطع ائتدیم کی، میرجعفر باغیرووا بئله بیر مکتوب یازیم:

"من سیزه آتا کیمی مراجعت ائدیرم. بی نسلیندن اولدوغومو بهانه گتیریب منی کومسومولا قبول ائتمیرلر. بئله گئتسه، صنعتیمی آتماغا مجبور اولاجاغام. کومسومولا، پارتییایا قبول اولونمایاجاغامسا، اینجه صنعتده قالماغیمین نه فایداسی؟ من گنجم، گرک تالعییمی ایندیدن حل ائد‌م. اومیدیم بیرجه سیزسیز. اگر مصلحت گؤرسنیز، من هئچ کیمه مانعچیلیک اولماسین دئیه، صنعتیمی آتارام".

اوچ گوندن سونرا گنج رققاصه‌نین سئوینجی دونیایا سیغمیردی. آذربایجان کمونیست پارتییاسی مرکزی کومیته‌نین کاتیبی میرجعفر باغیروو بی نسلیندن اولان امینه دیلبازییه رسمی مکتوب گؤندرمیشدی:

"سیز بو صنعتدن اوزاقلاشمامالیسینیز، هئچ ندن احتیاط ائتمیین".