کولت. آذ گونئیلی شاعیر ارسطو مجردین کولکلره قوشول شعرینی تقدیم ائدیر:

بیرآز گولومسه منیم سوسقون کوچه م .

پنجره لرین دولو بوشلوق، ایچین دولو قاپی.

ائولرین درد موزئیی؛

موزئی لرین دولو قارا دفینه لر.

کؤنلوم هئچ آچیلمادی، اللریم هئچ قیزمادی سنده.

نه قاتار ، نه اوچار، نه تار.

اؤتمز بیر بایقوشدا بورالاردان.

هیجانسیز گونلرینله سوورولدو گنجلییم؛

کوسکون گنجلییم.

هئیکلسیز آلانلاریندا هئچ زامان غوروروم اوجالمادی.

دیندیکده اؤیودلر یاغدی باشیما،سن بیلمزسن دئدی آغالار؛

من ده بیلمه دیم .

گولومسه ای یار گؤرمه میش کوچه م .

اسکیلیینی بوراخ اَس، کولکلره قوشول.

دویونلنمیش قاشلاریندا باتاقلیغا باتیرام سانکی.

نئجه وورسون اوره ک بونجا اوخشار اسکی هاوالاریندا.

قاچاغان قوشلو بوروقلاریندا ائله دولوخدوم کی...

بیر آز ایسیت، بیرآز اوینا منیمله.

شاختالی فصیللره منیم دؤزوموم یوخ داها ...