کولت. آذ رحمت یاشارین "من آذربایجانام" شعیرینی تقدیم ائدیر:

آدیم آغیزلاردا یئرلشمز قدر بویوک
آدیم اوجالاردان اوجا
بال کیمی شیرین
قان کیمی قیمتلی
آنا کیمی حورمتلی
و
سود کیمی دادلی

منیم آدیم آذرباجان دیر
یانی جان دیر.

منیم آدیم تورک دور
بیلگه قاآن بابام دئمیشکن
اوزونه گل تورک ائللری .
من تورکم
غئیرت دن توره میشم
تاریخین قوپولمایان واراغی دیر آدیم

آدیم سوموک کیمین چوخونون بوغازیندا قالیب ، نه اودولور نه آتیلیر
من سومرده، اورارتودا، خزرده، توروککی لرده یم
آدیم گوک تورکدور،اویغوردور ، اورخون دور،هون دور
عثمانلی نین قیزیل آی یام
صفوی نین قیزیل بورکو
قازاندا ایوان الی ایله دارا چکیلن تورکم
آلتین اوردویام
آوروپادا پاپلار اورگینه قورخو سالان
آدیم سیف الاسلام دیر

ایندی بو منم
آذربایجانین تورک بالاسی
دوشمن کونلونده اوخ یاراسی
تبریزده ارکم
اردبیلده ساوالان
زنگاندا سولطانیه کونبذی
اورمو گولویم
خدافرین کورپوسویم
قاراباغام
قافقازام
باکیدا حسرتله سیزلایان سازام
یارالیام ، یارادا منلی دیر
صمدی قوجاغلایان آرازام
من تورکم .من‌ آذربایجانام