گونئی آذربایجانین تبریز شهرین‌ده تانینمیش گونئی آذربایجان‌لی اوستاد آشیق چینگیز مهدیپور طرفین‌دن یارادیلان یئنی موسیقی آلتینین تقدیمات مراسمی کئچیریلیب.

Axar.az خبر وئریر کی، جومعه آخشامی گونو کئچیریله‌ن مراسیم‌ده یئنی حاضرلانان آلت «سازباس» آدلاندیریلدیغی بیلدیریلیب.

مراسیم‌ده اوستاد چینگیز مهدیپور حاضیرلادیغی موسیقی آلتی باره‌ده گئنیش چیخیش ائدیب.

««دالغا» موسیقی قروپو یاراندیقدان سونرا آشیق سازیندان فرق‌لنه‌ن بیر موسیقی آلتینه احتیاج دویولوردو. سازین سسی زیل اولدوغو اوچون یانین‌دا بم سسی ده اولمالیدیر کی، اونو تماملاسین. بونون اوچون یئنی آلته احتیاج وار ایدی. «سازباس»دا اساساً سازین تلری اوزرینده ایشلنیلیب و دییشیکلیک ائدیلیب. بیز سازین آغاجینا حیوان دریسی چکیب بم سس یارادا بیلردیک. اما بو وضعیت‌ده آشیق صنعتی و اونون آلتیندن اوزاقلاشاردیق. اونا گؤره ده یالنیز سازین تئللرینده دییشیک‌لیک ائتمکله یئنی آلتی حاضیرلادیق»- دئیه او بیلدیریب.

اوستاد چینگیز مهدیپور «سازباس»این حاضرلانماسین‌دا بیر چوخ گنج صنعتکارین رولو اولدوغونو، اونلارین فیکیر و تجروبه‌لریندن ایستیفاده اولوندوغونو وورغولاییب. او یئنی آلتین آذربایجان موسیقی‌سینی داها دا زنگینلشدیرجیینه اومید ائتدیینی بیلدیره‌رک صحبتینی یئکونلاشدیریب.