یوخاری

دومانلی تبریز ۳۰-اۆنجۆ بؤلوم

آنا صحیفه کولت
12 Punto 14 Punto 16 Punto 18 Punto

کؤچورن: فرخ جرایدی

سردار دان ایش اؤیرنمک گره‌کلی ایدی . من اوْنون یانیْنا یئتیشرکن ، اوْ منیم اۆزۆمه باخیْب آجیْقلی بیر صورتده گۆلدۆ . بوُ گۆلۆش هم آجیْقلی‌لیق ، همده شۆشه‌کی سالماغی گؤستریر دی .

من دۆشۆنۆردۆم . گؤره‌سن بوُ نه اۆچۆن دۆر ؟ نه من ، نه ده یوْلداشلاریمیز سردارین آجیْغینا نده‌ن اوْلان هئچ بیر حرکتده اوْلمامیْشیق . دؤزدۆم . نده‌نی‌نی سوْروشمادیم ، چۆنکۆ محلله نماینده‌لری مجاهدلردن بعضی‌لرینین اوُیغون سوُز حرکتلری اوْلمالاری حاقیندا گیلئیلی‌لیگه گلمیشدیلر . بئله ایشلر چوْخ اوْلاردی . سرخوْش‌لوق ائدن ( کئفلی‌لیک ) چوْخ ایدی . انقلابی اؤز قازانجی اۆچۆن آلت ائدن‌لرده آز دگیلدی .
سردار بوُ کیمی مجاهدلرین آدیْنی یازدیْریردی و گئتمک اۆچۆن اوْنلارا اجازه وئردی . بیر من قالمیْشدیم . سردار منه باخیْب سؤزه باشلادی:

« من بیلیردیم کی قادیْنا اعتبار یوْخدور . اؤزل لیکله بوُ ساری تۆکلۆ قادیْنلار تبریزی بیر-بیرینه ووُردولار. من سنه دئدیم کی ،آییْق اوْل ، من سنه تاپشیْردیم کی تانیْنمامیْش هر آداما سیْر وئرمک اوْلماز . بوُ دا سنین سئوگیلی و اعتبارلی قیْزین نینا . بیزی ساتمامیْش بیرجه اوْ قالمیشدی . اوْ دا بیزی روُس کنسولونا ساتدی.

« نه اوْلموشدور ، سردار ؟ نه ائشیتمیسیز ؟ »

« نینا نین اَره گئتدیگینی ائشیتمه‌دین می ؟ »

« نئجه کی ائشیتمه‌دیم ؟ ائشیتمیشم . سیزینله ده اوْ باره ده دانیْشماغا گلمیشم .»

« ایندی کی اَره گئدیب دیر ، داها نه دانیْشماق ؟ اوْنا جئهیز می وئرمه‌لییک ؟ گؤرۆنۆر قادیْنلارلا رفاقت ائتمک باره‌سینده بیراز ضعیف سینیز . تئز آلدانیْرسینیز . اوْنلارین یالان سئوگی‌لری ، یالان چی گؤز یاشلاری سیزین اراده نیزی چوْخ تئز پوْزا بیلیرمیش »
« ائله دیر سردار . من قیْزا چوْخ تئز ایناندیم . قیْزین اؤزۆده اینانمالی و سئویملی قیْزدیر . فکر ائلیرم کی اوْنو سردارین اؤزۆده گؤرسئیدی ایناناردی .»

« اَره گئدندن سوْنرا یئنه‌ده می اوْنا اینانیرسان ؟ »

« اوْدا منه اینانیر . اگر اینانماسئیدی ، من گؤستردیگیم آداما اَره گئتمزدی .»

« کیمه اَره گئتمیشدیر ؟ آللاه اوْنون توْیونو هئچ ده مبارک ائله‌مه‌سین»

« سردار ائله دئمه‌یین ، اؤز یوْلداشیمیزا وئرمیشم .»

« کیمه ؟ نئجه یانی اؤز یوْلداشیمیزا ؟ »

« آرشاک-ا . اوْنلار الکساندروپول-ا گئتمک اۆچۆن کنسول دان ایکی وثیقه ( ویزا ) آلمیْشلار . ویزا لاردا قوْینومدا ( جیبیمده ) دیر . بوُنلار قاییدیب گلنده قوُرشون و بوْمبا قاییرماق اۆچۆن لازم اوْلان ماشینلاری دا اؤزلری ایله بیرگه گتیره‌جکلر. »

سردار دۆشۆندۆ . اۆزۆمه دوْروخا-دوْروخا باخدی . باشیْنی ترپه‌درک دئدی :

« بوُ فکر کیمین فکریدیر ؟ بوُنو بیلن وارمی ؟ »

« هئچ کس بیلمیر . ایشی من قوُرموشام . بیر نینا ، بیر آرشاک ، بیر من بیلیرم . بیرده سیزه سؤیله‌دیم .»

« چوْخ ساغ اوْل . یوْخسا منیم قانیْم قوُروموشدو . قیْزی لازمی قدر تأمین ائت . گؤرۆنور کی قهرمان بیر قیْز دیر . گله‌جکده اوْ ، بیزه داها بؤیۆک یاردیْملار گؤستره بیلر .

تاریخ
2019.02.24 / 10:46
مولف
محمد سعید اردوبادی
شرح لر
دیگر خبرلر

سئوگی حاقیندا ۵ ان گؤزل رومان

ایران "نظامی بین‌الخالق فوندو" یاراتدی

فیلملریمی تورک دیلینده چکه‌جه‌یم - گونئیلی رژیسور

آذربایجان‌دا نشر اولونان کیتاب ایران‌دا ناراحاتلیق یاراتدی

سئوگی حاقیندا ۵ ان گؤزل رومان

قزوینین اوچ طبیعی اثری قئیدیاتا آلیندی

شوشادا نوبتی واقیف پویزییا گونلری باشلادی - فوتو

جئک سرچه - اسلامی و تورکلویو قبول ائد‌ن مشهور قولدور

تبریزده داها بیر تاریخی عابده محو اولماق اوزره‌دیر

آذرین بوزقورد اشاره‌سی توتدو، اردوغان آلقیشلادی - ویدئو

خبر خطّی
Axar.az'da reklam Bağla
Reklam
Bize yazin Bağla